احم احم
بناءا على طلب الجماهيير والناس اللى كانت مفتقدانى وبتزن عليا ليل نهار عشان ارجع لعالم التدوين  تاااانى (ولا حد كان فاكرنى اساسا ) اضطريت انى افتح المدونة من تانى
طبعا اكيد وبدون شك كلكو عاوزين تعرفو انا كنت قافلة المدونة ليه(بردو اكيد ولا حد بيسال اساسا) ا
اقولوكو
بس اقولوكو الاول كل سنة وانتو طيبين وعيد سعيد علينا كلنا يارب
ويارب تبقو مبسوطين السنادى وتبقو خارجين من رمضان على احسن حال
انابصراحة مكنتش ناوية اقفل المدونة كتير كانت ظروف عابرة كدة وقلت افوق بس وافتح المدونة
مرت ظروف ووراها جوابات  والجو كان كئيب شوية انما الحمد لله.. طول الوقت عاوزة افتح المدونة عشان ارجع تانى اشوف اخبار الناس اللى وحشتنى  و اقرا مدوناتهم وكل ما اقول افتح المدونة  تحصلى حاجة تحبطنى او تعطلنى
انما الحمد لله بردو جت سليمة وادينى اهو اعدة برغى
    قولت افتح المدونة فى مناسبة ساارررة  فاستنيت للعيد
بدل ما كنت افتحها فى جو الاكتئاب اللى كنت بعانى منه واعديكو
 لا لا متخافوش انا اتعالجت وبقيت تمااام
مش هطول عليكو  عشان تلحقو تاكلو الكحك
وكل سنة وانتو طيبيييييييين





..حتى لما نفقد اعز ناس لينا
 ..الدموع مصرة تعاندنا



من شوية كدة انا تميت عشرين سنة
ايوة عشريييييييييييين سنة
يااااااااااااااه بقالى عشرين سنة عايشة
والله احساس مختلف اوى السنادى بعيد ميلادى
اول مرة عيد ميلادى ياثر فيا كدة
حاسة انى كبرت خلاص مش عجَزت يعنى لا حاسة ان احساس الطفولة اللى جوايا دة ضااع خالص حاسة انى بقى عليا مسؤوليات مختلفة..واجبات لازم اعملها..فى حياتى كفاية سبهللة بقى ودلع.. كل سنة انوى اكون مختلفة فى السنة الجاية..واغير حياتى ونظامى عن السنة اللى قبلها
بس دايما بتبقى فى حاجة تربطنى بالسنة اللى فاتت وتخلينى معرفش اتغير..
اكيد طبعا حياتنا كلها مرتبطة ببعض ومش بتتفصل باعياد ميلادنا
لكن انا قصدى ان فى دايما مشكلة ما او موضوع بيخلينى عايشة جواه لفترة طويلة وانسى حاجات كتير المفروض اعملها


والسنادى بردو رغم ان فى حاجة بتربطنى اوى بالسنة اللى فاتت اللى لسة خلصانة من نص ساعة كدة انما انا ناوية باذن الله مخليش حاجة تاثر عليا
عاوزة اعمل حاجات كتير
بجد ناوية باذن الله احقق بقى جزء من الحاجات الكتيير اللى كنت باجلها دايما

اول حاجة ناوية عليها انى اقرب من ربنا اكتر من كدة بكتيييير
حاسة انى مهملة اوى فى النقطة دى
نفسى اكون احسن مع ربنا علشان احس بالرضا عن نفسى واقدر
اعمل اى حاجة ايجابية
لانى طول مانا حاسة انى مقصرة فى حق ربنا ودة علطوول
مبعرفش اعمل حاجة وبفضل متدايقة
وكمان نفسى اغير فى نفسى صفات كتير
يعنى مثلا عاوزة اكون نشيطة شوية ودى اكتر حاجة بتميزنى : الكسل
عاوزة اكون اكثر تفاعل مع الدنيا والناس وابطل عزلة شوية
عاوزة اخد كورسات تخلينى اعرف اتعامل مع نفسى قبل ما اتعامل مع غيرى
عاوزة ابطل اسيب حقى واتعلم اقول لاء فى وش اللى بيدايقنى
عاوزة استعد لسن الرشد بقى وابقى راااااشدة 
وكمان عاوزة اغير ستايل لبسى

..
وفى حاجات كتير تانى باذن الله هبدا اعملها
وان شاء الله هاجى فى عيد ميلادى السنة الجاية لو ربنا كتبلى
عمر واقولوكو انا عملت ايه جديد فى حياتى


...
دة كان الجزء النظرى من حفلة عيد ميلادى


دلوقتى نيجى للمهم بقى
يلا كل واحد يجيبلى الهدية بتاعتى ويسلمهالى على جنب كدة

واللى مش جايب هزعل منه

بس مش هحرمه من التورتة حرام

واللى هيدخل ومش هيقولى كل سنة وانتى طيبة هقفل فى وشة
المدونة بعد كدة
.........

اهم الهدايا اللى جاتلى




2-تم استبدال الهدية بكيس بسكويت :S


3-ماما حبيبة قلبى بقولها وانا فرحانة اوى هتجيبيلى ايه فى عيد ميلادى؟؟

قالتلى يا حبيبتى كفاية انى جبتك يعنى انا سبب السعادة اللى انتى فيها دلوقتى دى والمفروض انتى اللى تجبيلى هديا
قولت وانا حاسة انى بتدبس انتى تؤمرى يا حبى عاوزة ايه طيب اجيبهولك هدية عيد ميلادى؟؟
قالتلى انا عاوزة الموبايل بتاعك
نعم؟؟-
............

احلى الرسايل اللى جاتلى



كانت من ايمى صاحبتى
اول رسالة وصلتنى بمناسبة عيد ميلادى واكتر حاجة فرحتنى بجد
ورسالة من سارسوتى ربنا يخليهالى
ومونى
وبوسى
ولسة فى انتظار رسالة ..بس شكلها مش هتيجى


.....

معلش حفلة عيد ميلادى غريبة شويتين
تلاقيكو بتقولو مكناش عاوزين نحضر ياستى
اللى بيقول كدة دة هخنقه
دانا مكلفة نفسى وجايبالكو تورتااااااااااااااااااااااية بحالها
تورتاية كبيرة اااااااااااااااااااااااااااااااد كدة
اهى تحت اهى يلا اتفضلو
لحظة واحدة التورتة الاولانية دى بتاعتى انا
التانية بتاعتكو كلكو
يلا بالهنا والشفا
متتخانقوش

دى بتاعتى


اتفضلو التورتة
.. معلش اكلت منها حته
ايه كنت بدوقها


....................
ملحوظة اخيرة
طوووول عمرى ماما تقولى يا بنتى انتى عيد ميلادك6-2
بس انا عمرى ما اقتنعت ومصرة انه 29-1
عمرى ما افتكرت يوم 6-2 دة اصلا
بس شكلى من السنة الجاية هبدا اعرفه
ولو كان فى شهر تلاتة كمان يبقى افضل
حد لاقى 8 ايام زيادة:)





ياربى انا فى حلم ولا علم
مش مصدقة نفسى
مش مصدقةةةة
حد يخبطنى بالشاشة اللى قدامو يمكن افوق
بقالى شهر كامل متكامل بتعذب
اتبهدلت اخر بهدلة
وكل اما اتكلم يقولولى معلش يابنتى كله فى سبيل العلم

!!ايوة العلم
وبعد شهر الا تلت ايام من المعاناة وسهر الليالى و بذل الرخيص والغالى فى المذاكرة (انا مكنتش بفتح كتاب اصلا) بس اهو زيطة بقة
خلصـــــــت امتحانات اخيرا واخدت حريتى
تنطيط بقى ونت وهعوض كل الحرمان اللى شوفته



ههههه
والله حاسة كانى كنت محبوسة وكنت لا باكل ولا بشرب وكنت اعدة عالمكتب ليل نهار ال يعنى بذاكر بس انا ناصحة كنت بستغل الوقت فى التفكير فى مشاريعى المستقبلية وانفض للمذاكرة والحوارات البلدى دى



واليكم بعض من مذكراتى فى الامتحانات


كل يوم والتانى اروح الكلية ال ايه عندى امتحان
وياريت امتحان زى بقية الناس
!!لا دة امتحان الساعه اتناشر
عمرها ما حصلتلى
اتناشر دى الواحد بتفرج على فيلم القناة الاولى مش يمتحن
وكل يوم اصحى من النجمة و اقعد اقنع نفسى انى عندى امتحان وانى لازم استعد وامشى بدرى شوية
لحد الساعة 9 الاقى انى مفيش امل ومش مقتنعة اروح نايمة تانى بس كنت بصحى تانى طبعا
وطبعا بصحى بطريقة لذيذة اخر حاجة
بس الاقى ماما داخلة الاوضة وتزعق فيا

انتى لسة نايمة قومى امشى على امتحانك يلا
طيب يا ماما هقوم
قومى حالا
خلاص يا ماما قومت اهو خلااااص
لا قومى امشى
يا ساتر يارب همشى كدة
البسى بسرعة وبلاش دلع
طيب مش لما افطر الاول
يلا يابت مفيش فطار..انتى هتفطرى كل يوم ولا ايه
تحسو انى بتطرد
وناقص ابوس على اديها تقعدنى عندنا شوية
المهم دة طبعا من حرص ماما الفظيع على مصلحتى وعلى انى متاخرش على الامتحان لان المشوار من بيتى للكلية فيه ساعة وشوية و خصوصا فى زحمة الامتحانات الموصلات بتبقى شئ عظيم
قلب الام بقى
انا اعتمدت عليها وبقيت اتدلع كل يوم وانا قبل الامتحان لحد ما هى تيجى تصحينى
وجيت فى يوم الترجمة
اعظم ايام التاريخ طبعا
من كتر الفرحة قولت انام يمكن معرفش انام تانى فى حياتى
ونمت وكل شوية اصحى كدة ملاقيش ماما جت اقول يبقى لسة بدرى
اكيد احنا لسة الفجر
وانام تانى
فمرة كدة صحيت لاقيت الجو مش صبح خالص
فقلت يبقى احنا بنلعب فى الساعة تسعة ونص عشرة كدة
المهم قولت اصحى بقى النهاردة واوفر على ماما تعب كل يوم
و افتح باب اوضتى علشان الاقى الساعة فى وشى بتدق...
بتدق على 11
يالهوى
حداشر؟؟
المشوار بس ساعة وربع فى حالة اذا كانت متسهله
وانا بلبس فى يومين
مش فاكرة بالظبط ايه اللى حصل بعدها لكن بالظبط بعد 11 واربع دقايق كنت فى الشارع
ومحدش يسال على المنظر
اكيد كان منظر طبيعى ساحر
ههههههههه
والحمد لله الموصلات كانت زى الفل فى اليوم دة وصلت بسرعه جدا
واول وما دخلت اللجنة واستلمت الورقة ِ
مفيش شوية ولا قيت المراقبة بتقول
الساعة واحد الا تلت
الساعة واحدة الا تلت
ياستى اسكتى انا مش ناقصة رعب
وهى مصرة :الساعة واحدة الا ربع
اللى خلص يراجع ويسلم ورقته
ياخبر هو فى حد لحق يخلص الامتحان اللطيف دة
واعدت ارتعش بقى ومعرفتش اركز واقول الله يسامحك يا ماما
نفضتيلى ونمتى ليه
اتاريها كانت سهرانة بتتفرج على برنامج مع اسامة اطيب
وراحت عليها نومة

والحمد لله الامتحانات عدت وخلصت على خير
مش خير اوى
بس اهو الخير ان الواحد لسة بصحته
وحشنى عالم بلوجر اوى
ووحشونى المدونين كلهم
وشكر خاص جدا لكيكى حبيبة قلبى
..كانت بتطمن عليا لما ارجع من الامتحان وتشوفنى لسة عايشة ولا








يا جماعة هو حد مصدق ان امتحانات نص السنة هتبدا اهى
؟؟
حد متخيل ان التيرم الاول خلص
؟؟
شوفتو محدش مصدق خالص ازاى!!
انا كمان مش مستوعبة اللى بيحصل دة
كل يوم قبل ماانام اقنع نفسى انه خلاص الامتحانات على ال
ابواب
وحتما ولابد انى اتكفى على الكتب بقى اقرالى كلمتين ولا حاجة
بس مش مقتنعة خالص ان التيرم جرى بسرعه كدة واهو خلاص مروح
بقول فى نفسى ماهو لسة بدرى
على اساس انه منورنا يعنى مفيش لزوم يمشى بسرعة كدة
بس شكله زهق مننا ومصر يمشى
طيب فى الحالة دى لازم بقى الواحد يقوم بالواجب معاه باى حاجة قبل مايمشى
مش كفاية معملتلهوش اى حاجة طول المدة دى
ولا يقول علينا بخلا يعنى ..



..


ايام زمان

..
انا كنت بحب المذاكرة زمان
كنت ببقى فرحانة اوى بالدح
وان كل اللى فى البيت يقولولى ارحمى نفسك يابنتى شوية من الدح دة كله
قومى اعدى معانا شوية
وانا اقول ابداااااا
سيبونى اذاااااااااكر
لايمكن حد يبعدنى عن الموذاكرة حبيبتى
انتو عاوزين تضييعو موستقبلى
الامتحانت على الابواب "ونكون لسة فى اول التيرم اساسا"

واعيط لو ملحقتش اخلص مذاكرة سنتين قدام واحضر دارسين للتيرم الجاى
واللى كان بينطق كنت بيوريهم العين المحمرة..
.......


توداى


دلوقتى بقى بقعد على المكتب اتفرج عليه كدة وعلى جماله
القى نظرة على كمية الكتب والورق اللى فوقيه
وبعدين اقول ياترى ابدا بعلم نفس الحيوان الاول ولا تكنولوجيا التعليم
بيتهيئلى الافضل انى اذاكر جبر او جولوجيا واجل علم النفس لبعدين
وبعدين اكتشف انى مبدرسش الكلام د
ة والاقى كلام تانى خالص فى الورق
اتخد بقى واسيب المكتب واجرى كانى شوفت عفريت






.....

لابجد هو انا هبدا اذاكر امتى بقى
قصدى هتعرف على المناهج امتى
طول التيرم استعباط فى دلع على عيا
واخيرا اهو تخلف عقلى
كل ما اجى حمب مادة اقول دى مش مهم نبدا بواحدة تانية
وبعدين ارجع اقول لاء التالتة اهم واسيبنى من التانية
وهما اصلا سبع مواد
كل يوم العب عليهم حادى بادى
وفى الاخر بسمعهم سلام بودعك واقوم






السلام عليكم ورحمة الله وبركاته
كل سنة وانتو طييييبيييين
وياااااارب يكون عيد سعيد عليكم كلكم
ناس كتييير اوى وحشتنى من بلوجر واتبسط اوى انهم لسة فاكرينى وجم يعلقو على البوست الاخير بتاعى
بس انا بعتذر يا جماعة بجد مش هقدر ارد خالص
دعواتكم ليا بقى علشان انا تعباانة جدا الحمد لله على كل شئ
وبعتذر كمان لحاجات جوايا على التاج اللى محلتهوش بس انا كنت ناوية احله وجبت الاسئلة وجاوبت على اول سؤال بس مقدرتش اكمل
كان تاج حلو اوى وكان نفسى اجاوب عليه
يلا عيد سعيد عليكو كلكم ويارب تتبسطو




طول عمرى بدور فى وسط الناس اللى اعرفهم على حد يخاف عليا من غير مقابل

على حد يهتم بيا ويسمعنى من غير ما يكون مدايق

كنت بدور على حد نبقى لبعض اقرب من نفسنا

كنت بدور على صديقة ..

صديقة بجد يعنى مش اى كلام

تقف جنبى لما احتاجلها

وكل فترة كان بيتهيئلى انى لاقيت البنت اللى هتبقى توامى

واللى هتبقى ازى اختى

نبقى مع بعض فى كل حاجة

فى الحلوة والوحشة

صاحبت بنات كتييييييييييييييييييييييييير

او احسن اقول عرفت بنات واتهيئلى انهم صحابى

وكنت بتعامل بسذاجة جامدة اوى مع كل اللى ادامى

لحد اما اكتشف انه ابعد مايكون عن لفظ صديق

يا اما هيبيعك فى اول موقف صعب تواجه

او تلاقى الانانية واضحة فى كل تصرفاته

او

او

لحد ما فقدت الامل ان الاقى حد اعتمد عليه فى الشدة

او يقف جنبى وقت فرح

خلاص اتاكدت انه مبقاش ينفعش الاقى حد زى مابتمنى

وانا داخلة الجامعة بقى فى اول سنة ليا

داخلة وانا محبطة جدا من الموضوع دة

وبقول دايما فى نفسى اللى صاحب صاحب من زمان

يعنى اكيد كل البنات ليها صحابها من زمان وعمرى ماهلاقى حد زى مانا متخيلة خلاص

ومن غير ما اتكلم ولا اجيب سيرة عن الموضوع اللى مديقنى لاقيت ماما من اول يوم ليا فى الكلية

بتدعيلى فى كل صلا وتقول ربنا يرزقك الصحبة الصالحة

عرفت بتلت بنات حسيت انهم مختلفين بجد

من جوا كدة مفيش لا خبث ولا لئم ولا غباء

اعدنا مع بعض سنتين وانا بردو جوايا شك انهم مش اصحاب بجد

مش اصحاب زى ما انا كنت بتمنى

لحد السنادى ..

اولا حسيت انهم بيتعاملو معايا من جواهم بجد

مفيش تعاملات من على الوش اللى تدايق دى

ولا قيتنا بنخاف على بعض

وننعمل كل حاجة نقدر عليها علشان بعض

انا الموضوع ممرش عليا كدة عادى

وروحت فى يوم قولتلهم

ياجماعة احنا لازم نحمد ربنا دايما اننا بقينا اصحاب

ونحمده اننا موقعناش فى ناس تانى مش كويسين

ضحكنا شوية بس حسينا بجد بقيمة النعمة اللى احنا فيها

وبقينا نحمد ربنا كل نقعد مع بعض

وكل لما نرخم على بعض حتى

.....................

الاسبوع اللى فات دة انا تعبت اوى فى الكلية

بجد لاقيت جنبى ناس خايفة عليا

ناس اكتر من اخواتى

مش هينفع اتكلم على اللى عملوه معايا لانه بجد كتيير اوى

بس بجد انا بحمد ربنا ان ليا صحاب بجد


السلام عليكم ورحمة الله وبركاته
كنت قاعدة مبعملش حاجة وعيانة ومش قادرة اقوم من ع السرير وصحابى بلغونى دلوقتى ان فى محاضرة بكرة فقلتلهم انى مش هقدر اروح فقلت بقى طالما انا اعدة مبعملش حاجة ومش قادرة اذاكر وكمان مش هروح الكلية بكرة يبقى لازم اجاوب على التاج اللى mohamad ghaliaمررهولى

احب اشكره بجد على التاج دة لان شكله كدة هيفكر
الواحد بالسعاده واسباب السعادة نبدا بقى باسم الله

صحيح قبل ما ابدا انا بعتذر بجد والله لكل الناس اللى بعتولى تاجات وانا ماجاوبتش عليه بس والله انا كنت شايلة اللينكات فى المدونة ولما غيرت التيمبليت ضاعو اسفة بجد على التيجان نيجى بقى للتاج



التاج


السؤال الأول:ماهى السعادة من وجهة نظرك؟

السعادة من وجهة نظرى!!
ممممممم
ممكن لما يكون الانسان صافى الذهن مبيفكرش فى حاجة مفيش حاجة شغلاه او حاجة مدايقاه
لما يحس انه مش مضغوط
ولا وراه ميت حاجة لازم يعملها
السعادة ممكن تكون ان الانسان يكون حسس برضا من جواه عن كل شئ حواليه
مش عارفة بالظبط اقول وجهة نظرى شايفة السعادة ازاى لانى اوقات قليلة حسيت بالسعادة








السؤال الثانى: كيف تصل إلى السعادة؟


اول طريق للسعادة فى حياتى هو رضا ربنا
لما بحس ان ربنا راضى عنى وبيخلينى ارضى عن نفسى
ببقى سعيد جدا
بسيب كل الهموم اللى فى دماغى واحس انى ملكت الدنيا
بحاول دايما اوصل للسعادة عن طريق رضا ربنا عنى
لما بقرب من ربنا بنسى اى حاجة ممكن تقلل سعادتى
تانى حاجة رضا امى
نفس الموضوع
لما بحس برضاها عليا الدنيا بتضحك فى وشى واحس ان كل حاجة تمام



السؤال الثالث: هل السعادة وهم أم أنها حلم صعب؟

هى دى النقطة الاساسية
انا مش عارفة اذا كانت السعادة وهم ولا حلم ولا ايه بالظبط
انا كل اللى اعرفه انى لما بعمل الحاجات اللى قولتها فوق دى ببقى مرتاحة
يعنى ببقى مطمنة ومش مهمومة
لكن السعادة بمعناها اللى انا معرفهوش كويس مش عارفة بصراحة موجودة ولا فشر



السؤال الرابع: هل السعادة طريق للنجاح ؟وضح؟

لو اعتبرناها زى ما قولت فى اول اجابة
انها عبارة عن ان الانسان يبقى صافى الذهن .. مطمن .. مش مهموم ولا فى حاجة شاغلة باله
يبقى كدة احتمال تكون السبب الرئيسى للنجاح
لان من اهم معوقات النجاح الافكار اللى بتسيطر على الانسان والاحاسيس الكئيبة اللى بترجعه لورا دايما
ومبتخليهوش يشوف الامل فى بكرة




السؤال الخامس: ماهى أكثر اللحظات التى شعرت فيها بالسعادة؟


1- وانا ببكى لربنا
2-ماما وهى بتدعيلى وتقولى قلبى وربى راضين عنك
3-انا واخواتى لما نقعد نتكلم ونهزر مع بعض
4-لما بحس ان صحابى بيحبونى زى مابحبهم
5-لما اشوف النيل وقت الغروب
6-ولما اكل ايس كريم فى الشتا (محدش يتريق)


السؤال السادس:هل ممكن أن تحقق كل شىء؟

كل شئ ازاى يعنى
كل شئ انا بفكر فيه او اتمناه مثلا..
معتقدش
انا بحس انى بفكر فى حاجات كتير مفيدة ومهمة بس قليل اوى لو اخدت خطوة التنفيذ
يعنى تقريبا مبحققش اى حاجة من اللى عاوزة احققها
ودة بسبب الاحباط اللى بيسيطر عليا فى اوقات كتير


السؤال السابع: السعادة تجعلك تقبل على الحياة أم لا؟


اكيد
اللحطة اللى بحس فيها انى مبسوطة او جوايا رضا عن نفسى ببقى طايرة وببقى عاوزة اعمل اى حاجة وببقى شايفة كل حاجة سهلة ادامى
مبحسش بكلكعة كالعادة
لكن بحس انى نشيطة اوى ونفسى اعمل كل حاجة
لكن بسرعة الحاجات اللى بتحصلى والظروف المحيطة بيا بنسى اى لحظة سعادة
واركز فى الكابة


السؤال الثامن: هل أحسست يوما انك وصلت لقمة السعادة؟

مممم
يعنى مش للقمة اوى
بس اهو كانت سعيدة لدرجة كبيرة
وكان يوم قريب كمان
من شهرين كدة حسيت انى هبدا افك بقى من النكد وهبدا حياة جديدة سعيدة
حاولت احافظ على الشعور دة لاطول فترة ممكنة
بس حصلتلى ظروف قريب نسيتنى اللحظات دى
ولانى ضعيفة الارادة مدافعتش عن سعادتى
واستسلمت للهموم تانى


السؤال التاسع: لماذا تمر أوقات السعادة بسرعة؟

يمكن علشان احنا بطبيعتنا من وش سعادة
ناس نكدية يعنى
او لان السعادة مبتستحملناش
بتصرفاتنا..بافكارنا الغريبة.. بضعف ارادتنا واستلامنا
(انا بتكلم عن نفسى )



السؤال العاشر: هل ترى السعادة فى التدين؟

التدين "المظبوط" المعتدل" من وجهة نظرى هو اساس كل السعادة اللى فى الدنيا
واكيد هيكون سبب سعادة الاخرة بردة ان شاء الله



السؤال الحادى عشر: هل أنت متفاؤل وعندك أمل؟ وضح؟

على فترات
يعنى مش معنى انى نكدية وبتكائب كتير
انى شايفاها ضلمة اوى
لا انا اصلا كنت متفائلة
بس حبة حاجات سودا فوق بعضها كدة اثرت عليا شويتين
لكن حاسة ان جوايا لسة فى امل
لسة فى شعاع نور (هو بسيط نما موجود) بمشى وراه وحاسة انى فى الاخر هلاقى نور جامد اوى



السؤال الثانى عشر: إذا شعرت بالحزن ماذا تفعل؟

(السؤال الثانى عشر !! مش كفاية كدة ولا ايه؟؟)
1- بلجا لربنا
2- بنام طول الوقت
3- مبكلمش حد وبعد لوحدى
4- بفكر فى الوقت اللى فيه الحزن اللى جوايا هيخلص وابدا صفحة جديدة


السؤال الثالث عشر: هل يستمر معك الحزن فترة ام ينقضى فى الحال؟
فترة؟؟
لا
ممكن تقول فتراات
وفترات صباحية ومسائية وعلطول





السؤال الرابع عشر: ما رأيك فى الأفراد المتشائمين؟

محتاجين يقربو من ربنا كتييير



large مش كنت تقولى ان التاج دة مقاس


السلام عليكم ورحمة الله

وحشتونى اوى ووحشتنى مدوناتكم
انا بعتذر على الغياب وعدم المتابعة المدة اللى فاتت دى
بس كنت تعبانة ومضايقة شوية
بس الحمد لله فوقت بقيت احسن كتييييييييييير من الحالة غريبة الشكل والملامح اللى كنت عايشاها دى
كنت منكدة اوى الله لا يعيدها تانى
بس انا اصلا لو ملاقيتش حاجة تنكد عليا ادور على حاجة اقرف بيا نفسى علشان الاقى جو كئيب ملائم لطبيعتى النكدية
بس اتخنقت بقى من كتر النكد وقلت مبدهاش
بلاش نكد وخليها رخامة
اشتغلت نفسى كتير اوى الفترة اللى فاتت
رخمت عليا بما فيه الكفاية وصدعتنى اوى
كنت بقعد مع نفسى ملاقيش حاجة تدايقنى كنت افتح التلفزيون واقفل الريسيفر واتفرج على الشاشة وهى سودا حوالى ساعة او ساعتين
كنت اعد اكتب حاجات خاصة بالدراسة على الوورد وبعد ما اكتب تلت اربع صفحات اروح قافلة من غير ماسيفهم
او كنت اعد اتصل عليا من موبايلى وانا عارفة ومتاكدة انه هيدينى مشغول
بس كنت بحب استفزنى اوى
كل شوية ارنلى واسمع تيييييت تيييييت
لحد مالحالة دى وصلت لادمان
يعنى تلاقينى بكلم ماما او بعمل حاجة اروح سايبة كل حاجة ومتصلة عليا
وطبعا عشان الموضوع مايكبرش اكتر من كدة عملت لتليفونى خدمة بريد صوتى يعنى لو اتصلت بيا مش هيدينى مشغول تانى
لا دة هيقولى سيبى رسالتك بعد سماع الصفارة
ودة طبعا بفلوس الحاجة اللى هتخلينى ابطل اعمل كدة تانى علطول
بس والله نسيت واتصلت بيا
بس بعد كدة اكيد هفتكر لوحدى
دة رصيد مش اى كلام يعنى
المهم انا قلت ارجع تانى بقى لحياتى واسيبنى من الهم اللى مش جايب همه
وانتو طبعا ومدوناتكو اهم حاجة فى حياتى
وبعد كدة الكلية
بقالى زمن مروحتش
استعبطت كتتييير السنادى بجد
انا قربت انسى شكلها
بس الحمد لله على كل حال
...............................
انا سميت البوست صباح الخير
لان كنت حاسة انى فى ضلمة الفترة اللى فاتت دى
وفى عز ماكنت فى الضلمة كنت متاكدة انه هيجى وقت الدنيا تبقى صبح ومنورة عادى
والله رغم كل الاحزان اللى بمر بيها
كنت بصبر نفسى وااكد لها انه هيجى اليوم اللى انسى اى حاجة دايقتنى
واهو الحمد لله ادينى بقيت كويسة
وبجد بشكر كل الناس اللى سالو عليا
ربنا يخليكو ليا بجد
الواحد حاسس ان لسة في ناس قلوبها على بعض
وشكر خاص لحماتى وحبيبة قلبى
مـحـــــــــاســـــــن صـابر






No words express my feeling

...


تحديث:انا كنت ساكتة ومش عاوزة انطق لانها زى ماقلت حبيبتى وانا بحبها وقلت فى نفسى بلاش فضايح
immigrantانما لما جت حبيبة قلبى
فى التعليقات بتقولى كليتى نظيفة جملية متطورة
قلت حرام اسيبها على عماها وارويها الحقيقة بقى




اتفرجى يا هانم :@



كفاية دول انا بردو لسة بحبها


..........................................................................



احب احذر جميع البلوجرية واقلهم يحذرو كل اللى يعرفوهم وي
قوللهم ان

كليه الالسن ضاااااارة جدا بالصحة وتؤدى الى الوفاة




ياريت بقى كدة اللى فيكو لسة فى عز شبابه
وفى الثانوية العامة الله يمسيها بالف خير-كانت ايام دلع بصحيح- ميفكرش يجيب مجموع عالى لحسن التنسيق يحدفه على كلية الالسن
واللى عنده اخ او اخت بيفكر يدخلها يعمل فيه ثواب وينصحه لوجه الله
يا جماعة دى كلية عذااااااب
قالولنا ان الايام السودا هتخلص بعد الثانوية العامة وهتدخلو الكلية بقى هتبقو مكبرين دماغكو وبالكو رايق واخر تمام -بصراحة مش فاكرة مين اللى قال كدة بالظبط ولو افتكرت يبقى مش هسيبه فى حاله-
فى اول سنة انا قلت ان الكلام دة مظبوط فعلا الكليات دى دلع وراحة بال احسن من الضغط بتاع الثانوية العامة بمراحل وكفاية ان مفيش بقى لا دروس ولا وجع قلب
بالنسبة للدروس المعلومة اتغيرت على التيرم التانى
باقى المعلومات بدات تتصحح شيئا فشيئا
اتريهم كانو بيخدعونا فى اول سنة وبيدونا تلت مواد بس فى التيرم نطلع سنة تانية نتفاجئ انهم بقو تسعة
وكل مادة تلاقى دكتورين تلاتة بيدوها وكل واحد عايش بنظام غير التانى وعاوز حاجات غير التانى
وانت ايها الطالب المجتهد عليك تنفيذ كل مايطلبه -المستمعون -عفوا الدكاترة والا هيطلع عينك
الواحد صبر نفسه وقال مش مهم مش مهم لازم نتعب علشان نلاقى نتيجة
واشتغلنا على قد ما قدرنا والحمد لله طلعنا من سنة تانية معافيين تماما نفسيا وعصبيا ودة الشئ اللى الواحد مش متوقعه خالص السنادى
انا من اول اسبوع محاضرات وانا عماله اتصدم اتصدم
كل يوم اتصدم فى حاجة جديدة
لحد ما بقيت اكلم نفسى وانا ماشية فى الشارع والله
الدكاترة باين فاهمين غلط كل واحد يدخل يعيش مع نفسه يشرح الكلام اللى بيقوله دة ومالهوش دعوة بالطلبة ولو حد فكر ينطق تلاقى موشح ويقولو انتو فى سنة تالتة عاوزينا نعملكو ايه نشرحلكم عربى مثلا ونتكتبلكم على السبورة
والله لا عاوزين لا كدة ولاكدة _مع ن دة مش عيب يعنى _ انا بس نفسى حد يتناقش معانا
دى لغة يعنى ولازم نتكلم احنا كمان
نفسى اتكلم لغات ياناس
انا مش عاجبنى الوضع بقى وقلت لازم اكون ايجابية واتناقش مع الدكاترة
اول مرة

فى محاضرة ترجمة الدكتور بيترجم جملة بشكل غريب اوى.. انا قريتها على النت وفى الجرايد واخدتها قبل كدة بشكل تانى.. وانا وكل صحابى عملينها بنفس الشكل.. المهم روحت قايلاه يادكتور انا عملتها كدة لان... ولان... واعدت اشرحله وجهة نظرى
الشئ العظيم اللى عمله ان كان منصت ليا جدا حتى انا كنت مستغربة من اهتمامه بكلامى واستنى لحد ما خلصت كلام وراح باصصلى كدة -انا قلت هيرد عليا- وراح باصص فى الورق اللى فى ايده وكمل ترجمة
كل صحابى اعدو يضحكو عليا وقالولى متبقيش تحرجى نفسك بعد كدة
طيب دة راجل طيب.. اقتصر وكبر دماغه منى ومن كلامى وخلاص



الدكتورة التانية
بردو بتاعة الترجمة
جيت اقرالها الجملة اللى انا مترجماها من اول كلمتين تبصلى كدة شذرا -والله كانها قرفانة من حاجة اوى- وتقولى:
غلط
غلط
لالالالا
ايه دة
طيب يا دكتور ماتسمعى للاخر وبقنعها
راحت قالتلى طيب قولى تانى كدة
جت بردو عند اول كلمتين وقالت نفس لكلام:
لالالا
غلط
وراحت مكملة ترجمة هى
وطلع كلامى صح بس هى مستنتش تفهمنى
حسبى الله

الدكتور التالت بقى
بتاع المحادثات
دخل اول يوم
ابتسامة عريضة.. وش سمح.. هدوووء كدة
وقال انتو اللى لازم تتكلمو (ياخواتى على البراءة)
دورى انى اسيبكو تتكلمو علشان اللغة تتحسن عندكو انا هنا علشان اسمعكو واصححلكو اخطائكو
دة كان اول محاضرة
المحاضرة التانية علطول كان واخدها كلها لحسابه

وسنته سودا اللى هيتكلم
وكنت عاملة دايلوج نفسى اقولها
بس محصلش نصيب الصراحة
انتو طبعا عارفين كل شئ قسمة ونصييب...

انا مش قصدى انى صح ولا انى بفهم اكتر من الدكاترة
بس انا نفسيتى بتتعب لما بحس انى بروح اعد زى الحمار واجى
بجد التعليم بقى شئ يخنق اوى
واللى عاوز يتعلم بجد بيتخنق جدا ورغم كدة انا بحب كلية الالسن جدا والله
ومستحملاها علشان بجد بحبها

بس للحب حدود بردو فيها ايه يعنى لو حبيتها وهى كمان حبتنى بدل ماهى مطلعة عينى كدة

الناس صحابى اللى فى اداب وحقوق عايشين عيشة مختلفة تماما لا بيسالو فى دكتور ولا بيحضرو اصلا بيروحو يعدو مع بعض ومكبرين دماغهم وكلهم بيجيبو تقديرات
هتقولو علشان بيذاكرو فى البيت
طب مااحنا كمان بنذاكر فى البيت بس هما مبيعقدوش نفسهم ويخلو الدكاترة تخنقهم
بفكر اعمل زيهم اكبر دماغى طول السنة وفى الاخر دح وملازم وخلاص
بس انا عاوزة اتعلم

ابقو اسالو عنى بقى لو غبت كتير
احتمال اتوفى بسبب الكلية..


Subscribe to: Posts (Atom)