بــــــــــ عنــوان ـــــلا: 09.08

undefined undefined

يابرتقال احمر وجديد.. بكرة الوقفة وبعده العيد

22 التعليقات دى بتاعة البوست اللى تحت دة

كل سنة والامة الاسلامية بخير وسعادة
وربنا يكرمنا جميعا ويتقبل مننا شهر رمضان ويعودو علينا بخير ان شاء الله
رمضان خلص خلاص
بس جيه بعده العيد

يارب يكون عيد سعيد
وعاوزين نحس بيه بقى مش يجرى كدة بسرعة واحنا قاعدين فى البيت وادام النت

ياريت كلنا ننفض للنت بقى فى العيد ونخرج نتفسح ونصل ارحامنا علشان منرجعش نقول العيد زمان كان احلى
فعلا كان زمان احلى لاننا كنا احسن من كدة وكمان مكانش فيه النت اللى بيسرق وقتنا دة
يلا كلكو سيبكو من النت وانتشرو فى الشارع
وكلولى معاكو كحك وغريبة وبيتى فور علشان انا اسنانى وجعانى

وكمان خدولى معاكو العيدية علشان انا مبخدش عديات
او بمعنى ادق محدش بيدينى بيقولولى انتى كبرتى بقى على الكلام دة

بس بطلع عيلة بقى فى الحاجات دى

كل سنة وانتو طيبيييييييييييييييييييييييييييين

undefined undefined

عودة الندلة

26 التعليقات دى بتاعة البوست اللى تحت دة

ازيكو عاملين ايه؟؟
كلكو طبعا كنتو قلقانين عليا من البوست اللى فات
وكنت صعبانه عليكو
بس احب اطمنكو انه خلاص كل شئ اتظبط
ودلوقتى لو حد من اخواتى شافنى داخل المطبخ
ممكن يبلغ عنى البوليس

قولتولى ليييه ؟؟؟
اقولوكو
بصراحة انا فى الاول الموضوع كنت واخداه من ناحية افطر صائم وثواب فى ماما والكلام الجميل دة
الايام تعدى ورمضان بيمشى وانا مقضياها مطبخ وطبيخ و و و
جينا بقى قبل العشرة الاواخر وحسيت ان الوقت بيجرى بيجرى..
طب مانا لازم الحق
واقول لماما :يا ماما ياحبيبتى انتى يا ست الكل اقعدى صلى فى البيت واعملى معايا حاجة

تقولى: يابنتى هو رمضان بيجى كام مرة فى السنة دة بيجى مرة واحدة ياحبيبتى
طب يعنى هو بيجى عندى انا عشر مرات دة كدة حرااام الصبح طبيخ وبليل غسيل وترويق
لا و اول ماجى انام الاقى حاجة فى ودنى بتقول : سحووووور
بقلبى الطيب افتكر ان فى حد هيصحينى اتسحر
اتفاجئ ان اخويا بيقولى: قومى يلا جهزيلنا السحور
ااااااااااه حرااااااااام

خلاص بقى قررت اخد وقفة قولت اعمل بالنصايح الشريرة اللى سمعتها قبل كدة وعمالة تلعب فى ودانى
وفعلا بدات انفذ

اول يوم
كنت حنينة عليهم شوية عملت كل حاجة زى العادة وجهزت البلح والعصير والحاجات اللى بتبقى قبل صلاة المغرب علطول وجينا بقى للاكل
عملتلهم اكل مفيهوش ذرة ملح حاجة كدة يعنى توجع المعدة اكل عيانيين وقلت اهو هيقرفو ويخلصونى من المطبخ ...
الاقيهم بكل روح رياضية يقولولى :الله تسلم ايدك والله الاكل النهاردة جمييل بس ناقص حبة ملح
يا حبة عينى هو دة اللى ربنا قدركو عليه!!

اعدت بقى طول الليل شغلت دماغى قولت الاكل الدلع اكيد ليه حل ..لالالا بلاش منه
انما لما ازود الملح هتبقى تماااام

وجيه تانى يوم
وخلصت كيس ملح على الاكل.. بصراحة كنت مرعوبة وانا على الاكل
واعدت متنحة فى وشوش الناس اللى اعدة تاكل ولا فارقة معاهم

اتصدمت طيب يا جماعه حد يتكلم حد ينطق مفيش
ياااه للدرجادى مش حاسيين اكيد ماما جايبة نوع ملح ردئ مش بيحدء الاكل كويس
طيب ياربى اعمل ايه بقى والله انا عاوزة اتفرغ فى العشر ايام الاخيرة دى وقلت كويس مفيش دراسة ولا وجع دماغ يطلعلى الهم دة وبعديييين بقى لا دلع نافع ولا حادء نافع دول هيشلونى

اليوم التالت بقى

العصر ياذن..
ماما: ماتصحى يا نونو انتى هتنامى لحد امتى انتى لسة معملتيش حاجة خالص
انا :ياااااااه دة العصر طيب وسايبانى ليه لحد الوقتى (ال يعنى انا زعلانة عشان صحيت متاخر) طيب يا ماما انا هعمل كل حاجة بسرعة
خمسة ونص ماما:ايه انتى لسة محمرتيش الفراخ ولا حطيتى المكرونة فى الفرن ولا قطعتى السلطة و لا ... ولا... ولا
انا : معلش ياماما روحى ارتاحى انتى وكل حاجة هتخلص ان شاء الله
فطرنا فى اليوم دة بعد صلاة التراويح
اخويا 1: بقولك ايه انتى تعملى الاكل من بليل مينفعش كدة انا معرفتش اصلى انا كنت هموت من الجوع
انا :ياريت طب قول لماما تجيب الاكل من بليل وانا هعمله معنديش مانع...
اخويا 2:بقولك ايه بليل الصبح ماليش دعوة لما المغرب ياذن عاوز الاقى الاكل جهز

انا:(اخويا دة ممكن لو ملاقاش الاكل جهز ياكلنى انا شخصيا) حاضر من عنيا بس ماما هيا اللى بتجيب الحاجة متاخرة ..انا ذنبى ايه (طبعا بتكلم بمنتهى البراءة) بكرة ان شاء الله هعمل الاكل بدرى

تانى يوم صاحية من النجمة ودخلت المطبخ وطبعا عمالة اعمل دوشة علشان يتطمنو انى بعمل الاكل ويجرى اليوم كالعادة وتيجى الساعة خمسة ونص والاقيهم بقى بيدخلو المطبخ كتيير ال يعنى عاوزين يساعدونى وياخدو منى الاكل..
وتبقى المفجاة
انى
انى
انى
كنت بغسل المواعين وبعملهم كنافة وقطايف

طبعا كرهتم فى الكنافة والقطايف واى نوع حلويات

اخويا1:فين الاكل
انا :لسة معملتش

اخويا 1: اومال كنتى بتعملى ايه طول النهار؟؟
انا:كانت ماما عاوزة كنافة قلت اعملها ومعرفش ان الوقت هيجرى بسرعة
اخويا2:-يجى على صوت اخويا1 وهو بيقول حسبى الله ونعم الوكيل- نعم!! هو النهاردة كمان مفيش اكل انتى بتستهبلى!! الكنافة دى ماما بتقول عليها بقالها اسبوع اشمعنا افتكرتيها النهاردة وكمان خدتى فيها طول اليوم

انا:طيب اعمل ايه ما عقبال ما عملتها يادوب لحقت اوضب الاكل ولسة هسويه
اخويا 1:طيب احنا ناكل ايه دلوقتى
اخويا 2: كل فى نفسك يا فالح ..دلع بنات!!

ماما:خلاص يا ولاد حصل خير
انا:- فى سرى- والله يا ماما انتى سكر
الاقيها بتقول: احنا نطلب اكل جاهز ولما تخلص هيا تبقى تاكل
اعاااااااااااااااااااا

ومن يوميها اخواتى بيخلو ماما هى اللى تعمل الاكل ويطمنو بنفسهم كل شوية ان الاكل جهز
وانا بقى اخدت افراج..

وربنا يعينى ويعينكو فى الايام دى
اشوفكو فى العيد باذن الله
وكل سنه وانتو طيبين

undefined undefined

رمضانيات اوريجنال هارت

69 التعليقات دى بتاعة البوست اللى تحت دة

كان نفسى اقولكو ليلة رمضان كدة كل سنة وانتو طيبين بس ظروف التعب بقى والبرد ربنا يعافيكم جميعا
اهو الحمد لله
مش عارفة ليه بقى لما رمضان دخل علينا كدة محسيتهوش زى الرمضانات اللى فاتت
ماما بتقولى مدام فرحتك برمضان قلت يبقى ايمانك قل
ياماما ربنا يزيدنا ايمان بس الموضوع مش كدة خالص

انا حاسة ان كل الظواهر بتاعة رمضان بقت تتغير
يعنى مثلا زمان قبل رمضان او ليلة رمضان الاقى الشارع فيه زيطة والعيال عمالين يعلقو الزينة واحنا بنزين الشجرة اللى قدام البيت وكان فيه بهجة كدة

انما دلوقتى قبل رمضان اينعم فيه زيطة انما زيطة تانية خالص تلاقى كل الناس بتتكلم عن جنون الاسعار والسكر والرز والسمن بقو بكام حتى العيال بطلت تعلق زينة وتعد تتناقش فى سعر الصواريخ اللى ارتفع مرة واحدة كدة

دى حاجة
حاجة تانية بقى
زمان كنت فى رمضان بالنهار طول اليوم اعد اكل و اشرب بس والله كنت ببقى ناسية واخواتى يشفونى ويقولولى انتى صايمة افتكر بقى واروح اقول لماما ياماما انا هفطر عشان نسيت واكلت حاجة من التلاجة تقولى مدام كنتى ناسية يبقى خلاص كملى صيام
وقبل ماتكون خلص كلامها اكون نسيت وروحت كلتلى تلت اربع حاجات تانية
وعلى الفطار كنت ببقى هطق من الشبع

هههههههههه
انما دلوقتى
-
-
-
طول النهار ادعى واقول يارب انسى بقى انى صايمة لكن الاقى حاجة فى ودنى تقولى
انتى صايمة

انتى صااايمة

انتى صااااايمة

خلاااااااااااص بقى

والله عرفت

كل دى حاجات بسيطة
انما بقى اللى مش بسيط خالص لما رمضان يجى وانا فى الاجازة وتلاقى كل اللى حواليك
بيقولو يلا انتى بقى استلمى المطبخ اهو لا وراكى لا شغلة ولا مشغلة لا مذاكرة ولا كلية اهو تريحى ماما شوية
ياخبر

ايه يا جماعة انتو بتهزرو ولا ايه

لا والله العظيم ابدا دول مبيهزروش دول بيتكلمو جد

واااااااااااااااااااااااااااااااااااء

ومن اول يوم رمضان وانا مبخرجش من المطبخ
اتحنطت جواه
حتى بيفطرونى ويسحرونى جوا

طيب مساااعدة يابشر
النجدة
المطافى طيب
مفيش

لا وكمان مبيرحموش
كل اللى نفسه فى حاجة يدخل يورينى وشه الجميل
ويقولى نفسى اكل النهاردة كذا ..وكذا.. اه صحيح وكذا كمان

لا ظريف يا خويا انت وهو

ارحمونى شوية

ويعدو يطلعو عينى طول النهار وميرضوش حتى يقطعو السلطة

خلونى اغنيلهم طول النهار كفاااااااااية بقى تعذيب وشقى
بردو مفيش فايدة
واول ما اخلص على العصر كدة واقول هاخد نفسى بقى
الاقى واحد داخل يقولى يااااااااااه نفسى فى الكنافة بغباء
اقولو طب وانا مالى
يقولى البركة فيكى بقى اعمليلنا كنافة مدام انتى فاضية كدة
حسبى الله ونعم الوكيل

وقبل ما يخلص كلامه الاقى المحروس التانى داخل يقولى
انا عاوز اكل بسبوسة
ايه البلطجة دى

-الحمد لله ان التالت مسافر -
واستنجد بماما :يامامااااااااااااااااااااااااا
ترد تقولى القطايف سهلة اوى يا حبيبتى هاتى احشيهالك وانا قاعدة كدة
انتى كمان بترسمى على قطايف

ربنا ما يحكمكو على صايم
-
-
لحد هنا
مفيش مشاكل اهو بعمل الاكل اللى هكلو وخلاص بقى
واخد فيهم ثواب بالمرة
انما المشاكل بعد الفطار
بس نخلص فطار وادخل المطبخ وانا مغمضة عينى عشان افتحها مرة واحدة ويجلى
انهيار عصبى

من كمية الاطباق والكوبايات والحاجات
الكتييير اللى مالية حوضين..
معرفش ليه فى رمضان كل اللى عنده حاجة مستخبية يطلعها
امى ما بتصدق رمضان يجى وتطلعلنا طقمين الصينى اللى بقالهم سنة محدش شايفهم على طقمين خشاف على مش عارفة ايه
وكله بيجى فوق نافوخى انا
كله بيتكوم فى المطبخ
ويلا بقى يا شاطرة صبنى

اروح اصلى قبل ما اعمل حاجة واعد فى الركعة الواحدة ربع ساعه وادعى ان ربنا يرحمنى
واعد اتحسر على ايام زمان واقول الله يرحم ايام مكنت بقعد احط رجل على رجل واخواتى يعملو كل حاجة