هاهاها هاها هااا
-ضحكة مالية مركزها كدة-
بما انى فاكرة ان التاج دة حاجة كويسة وبتدى برستيج للمدونة والمدون فانا بقى-ضحكة مالية مركزها كدة-
مالية مركزى اهو
مين قدى عندى تلت تاجات مرة واحدة
وقبلهم علطول كان عندى تاج وكان عندى برد وحالتى حالة
اقول ايييييه
مفيش فى قلوبكم رحمة
اظاهر الناس كان عندها حق لما قالولى بلاش تفرحى اوى بموضوع التيجان دة
ملحقتش اخلص الواجب اللى فات الاقينى فى اول تعليق عليه اتدبست فى واحد جديد وتتوالى التدبيسات
يلا استعنت ع الشقا بالله
......
اول تاج من التلاتة تاج من
emmy baby
ربنا يقدرنى واردلها الجميل
< < < التاج اللى فات حاساه كان سهل شوية دة بقا شكله مصيبة ربنا يستر واعرف اجاوب صح يلا السؤال الاول سين سؤال
............
من الذى دبسك فى هذا الواجب ؟
جيم جواب
العزيزة emmy baby
السؤال التانى
............
اذكر القوانين المتعلقة بالواجب ؟
اكيد انى ادعيلها كل يوم قبل الاكل وبعده
ومرتين بعد النوم
التااالت
..........
اذكر ستة اسرار قد لا يكتشفها من يقابللك للمرة الاولى ؟
ممممممم
كتتير
لان الناس بتقول عليا غامضة
نقول بقا
1-حساسة :مستحيييل اللى يشوفنى لاول مرة يعرف عنى كدة مش عارفة ليه يعنى بس لو بقى فى بينا معرفة جامدة يقولولى مكانش باين عليكى خالص موضوع الحساسة دى
انا بقول يمكن عشان انا فى اول مرة كدة ببقى جد وبتكلم بصرامة شوية
هههههههه -حلوة اوى صرامة دى-
2-ذكية:او بمعنى ادق شاطرة فى الدراسة طول عمرى الناس تحسبنى غبية وبليدة ولما اجيب مجموع حلو يتفاجئو اوى
لما كنت اروح اخد درس فى الثانوية العامة المستر اول ما يشوف وشى يقولى وانتى بقى عاملة ايه ؟؟
شاطرة يعنى ولا هتطلعى عنينا اقولو الحمد لله الاقيه يقولى باين
وبعد كدة ماما تسال عنى يقولها ادعيلها
مالك ياعم انت شايفنى غبيه ليه كدة
كانو بينرفزونى
وصحابى فى سنة تانية قالولى عاوزة تدخلى كلية ايه فقلت يا اعلام او السن منهم اللى
ضحك ومنهم اللى قالى انتىىىىى بسخرية كدة
ولما اتقابلنا فى تالتة بقى وطلعت الاولى على المدرسة احترمونى بقى اخر احترام
وكانو بيقولو عليا سوسة ال يعنى مش مبينة انى شاطرة بس والله مش قصدى حاجة
حتى اهلى والله اتفاجئو لما جبت مجموع حلو فى الثانوية العامة
مش عارفة!! مع انى بمشى طبيعى يعنى ومش بهرش فى راسى كتيير
3-جدعه:والله الموضوع دة بيدايقنى الناس بيقولولى ان فى الاول كدة بيبان عليا انى
ندلة او مش جدعه يعنى
بس بعد كدة بيتفاجئوووووووووووووووووو
اصلى جدعه جدعنه موردتش على حد
ههههههههههههههههههه
4-حزينة:انا عارفة ان الحزن دة حالة بس انا حاسة انه مع مرور الوقت اتحول عندى
لصفة ومش اى حد يكتشفها لانى ببان فى منتهى المرح والزقططة مع الناس ومببينش حزنى لاى حد-
5- فى ناس كتير اول لما تشوفنى تقول عليا دمى تقيل واتمة كدة وماليش فى الهزار
ياعينى ميعرفوش حاجة
بس مش بهزر مع اى حد من اول مرة كدة
6-كتيير بردو بيفتكرونى مغرورة او متكبرة وبيقولو عليا طالعه فيها مع انى والله
اجتماعيه اوى وبكلم كل الناس عادى بس يمكن عشان احيانا كتير بيبقى ليا حدود فى
التعامل مع الناس ومش بكلم اى حد معرفهوش ولو كلمته بيبقى بتحفظ شويتين
يعنى مثلا لو ماشية مع صاحبتى وهى قابلت صحابها واعدو يتكلمو انا ممكن منطقش
خالص واقف اتفرج
بكسف ادخل فى الكلام
الرااااااااااااااااااااااااااابع
....................
اذكر 16 صفة عن نفسك؟
احب اسال سؤال سهل اوى
ميييييييييييييييين اللى حط السؤال دة
نفسى اعرف جيه على نفسه كدة ليه
وبيقول السؤال بكل بساطة وجراءة ووضوح ال يعنى مش همه
طيب ياسيدى هنجاوب
بس
م الاول كدة نتفق على حاجة
اللى هى انى شخصية متناقضة جدا يعنى ممكن تلاقو فيا الصفة وعكسها
محدش يستغرب من حاجة دة الطبيعى بتاعى
ومعنى كدة اننا ممكن نقسم الستاشر صفة على اتنين واقول تمانية وانتو هاتو عكس
التمانية يبقى عندكو ستاشر
شوفتو النصاحة
1- صفة المدونين الاولى: اصلى كل لما اقرا تاج وفيه صفات اول صفة الاقيها مكتوية انا عصبى جداا...
اسم الله عليا بقى عصبية جداااااااااااااااااااا
ماما بتقولى دايما اهو انتى بقى اللى قالو عليه بيتخانق مع دبان وشه
دة مش عشان انا بتخانق مع حد بس لو فى دبانة وقفت على وشى بيبقى يوم اخبر بتعصب جدااااااااا
يعنى من اقل حاجة تلاقينى اتعصبت
2-عنيدة جدا يعنى مش سهل انى اقبل باى حاجة واحييانا تلاقى مخى مخ عيال واعند على حاجات تافهة
وفى نفس الوقت انا مطيعه جدااا
سبحان الله
بس والله فعلا ماما واخواتى بيقولو عليا مطيعة
يعنى لو ماما طلبت حاجة بنفذها او لو حد من اخواتى قالى حاجة مش بعاند يعنى لو
طلبو طلب او لو اتناقشنا فى موضوع تلاقينى مش بشد قصادهم ولو ليهم ملاحيظ -حلوة ملاحيظ- على هدومى او مواضيع تخصنى بردو مش بتخانق ولا بعند ممم وفى حاجات كتير يعنى ببقى مطيعة
3-كسولة:يابنتى اصحى بقالك تلت ايام نايمة
سيبينى ياماما نفسى اناااااام
يابنتى انتى لسة صاحية بقالك نص ساعه لحقتى يكبس عليكى النوم
يا ماما سيبينى بقى
نامى ان شالله تنامى العمر كله مش هصحيكى تانى تعبتى قلبى
اسطوانة كل يوم
معرفش بنام كل يوم اكتر من 18 ساعه
وال6 الفاضلين مبعملش حاجة تذكر
الكسل مسيطر عليا جدا
هتقولو دة بس عشان الاجازة
لا بردو فى الدراسة بروح الكلية بالعافية وارجع انام واصحى اكل وارجع انام تانى ومش
بذاكر غير اخر شهر والتيرم اللى فات دة ذاكرت فى الساعات الاخيرة قبل كل امتحان
ربنا يلطف بيا بقى فى السنين الجايه
4-كتومة:يعنى سرك فى بيييييير بير غويط يعنى مالهوش قرار مش سهل ان حد يقولى
سر واقوله لحد دة مستحيل اصلا
عشان كدة تلاقى كل الناس عمالة تقولى اسرارها لغاية ما هفرقع من كل الاسرار اللى
بسمعها وكل الناس عاوزة تفضفض مع حد زى بيسمع وميتكلمش بس الصفة دى
مفيهاش تناقض والله دايما ببقى زى مانا مبغيرش النظام ههههههههه
يلا اللى عندو سر يجى يقولوه
5-صاحبة صاحبتى : بصاحب بجد مدام الانسانة اللى قدامى دى قلت عليها صاحبتى خلاص
بقى تطلب عنيا وانا مش هتاخر ممكن اعمل اى حاجة عشان صحابى لانى بحبهم اوى ولو فى ايدى اى حاجة اقدر اقدمها مش بتاخر ولو حد طلب منى حاجة ومقدرتش اعملها
بتدايق جدا وازعل من نفسى وباجى على نفسى كتييير عشان صحابى
بس بدايق اوى لو لاقيت اللى قدامى مش بيتعامل معيا بنفس النظام او على الاقل مش بيقدر
6-مرحة و نكدية:كتير بحب الهزار والضحك او حتى لو مش هيبقى فيه هزار وتهييس
يعنى بحب الاقى الجو اللى حواليا مبهج ومليان فرحة واتصرف من غير ما افكر فى
الكلاكيع اللى جوايا وفى نفس الوقت انا اكتر حد ممكن يتقال عليه كئيب
بجد اتشهرت وسط الناس ان البنت دى كئيبة اوى بتحب النكد بس اللى يعرفنى اوى
بيقول انى مودية يعنى وقت النكد نكديه درجة اولى
و وقت الهزار باش مهيسة كبيرة
والحالة دى بتنعكس على تصرفاتى فى الحياة
يعنى مثلا على سبيل المثال
لو انا فى حالة مرح وبشترى حاجة
يبقى مستحيل اشتريها غير لما افاصل فيها بافترى ولو مخدتهاش بالسعر اللى انا
عاوزاها ممكن نفسويتى تتحطم
ولو كنت منكدة وانا بشترى حاجة
يبقى هيضحك عليا فيها جدا وهبقى عارفة كدة بس هشتريها من غير ما انطق
7-منغلقة:مش عارفة الكلمة صح ولا ايه بس اقولكو معناها وانتو تعرفو
قصدى لما بحس بحاجة بحب اكتمها جوايا اى حاجة
يعنى لو حد ضايقنى مقولش لحد ابدا ان فلان ضايقنى او اشكى ولو حصلى موقف محرج
او حاجة بسكت خالص ومقولش لحد
ولو حد كسفنى مثلا تلاقينى مردش واكتم جوايا
ومن دة كتييير
8-متسرعه: الدنيا عندى بتمشى بسرعه الصاروخ مفيش تفاهم
بزعل من نفسى كتير لما باخد قرارات بسرعه او احكم على اى حد من غير تانى
بتسرع فى حاجات كتير
ممكن فى كلمة اقولها وازعل حد منى
او تصرف اعمله من غير تروى وارجع اندم علي
نفسى ابقى عاقلة كدة وراسيه على راى اماما
9-مبعرفش اخد حقى:يعنى دة الطبيعى بتاعى لو ليا حق عند حد هو ممكن يدهولى او لاء
انا مبعرفش اخده فى كل الحالات يعنى لو فى اشياء مادية بتكسف اطلب حاجتى وممكن
تتنسى وانا منطقش
او لو فى موقف معين تلاقينى معرفش اوصل وجهة نظرى للقدامى او اخد حقى منه
يعنى اتلغبط فى الكلام ومعرفش اتكلم صح فحقى بيضيع برده
10-كتيييير اوى مبعرفش اوصل الافكاار اللى فى دماغى للقدامى
وتلاقينى وانا بتكلم فى موضوع واحد فتحت على عشر مواضيع والدنيا تتلغبط فى دماغى
اقوم اسكت خالص بقىواحاول اظبط الافكار وارتبها تانى فى دماغى
11-خجولة و جريئة:كتييييير اوى بلاقى نفسى بتكسف من حاجات عادية بس بحبنى
وانا كدة اوى بفرح بيا لما الاقينى اتكسفت فى اى موقف كدة بحس انى عندى دم والحمد لله
ذلك رغم ان صحابى دايما كانو يقولو عليا جريئة جدا
ولما يبقو عاوزين يكلمو استاذ فى حاجة معينة او يشتكو للمديرة من حاجة يقولولى يلا انتى جريئة روحى انتى
كلميها
(بيتهيئلى اكتسبت السمعه الجامدة دى بعد موقفى مع المديرة بتاعة المدرسة دة موقف كبير كبير يعنى هبقى احكيه بعدين )
12-صريحة:اللى حواليا بيقولولى انى صراحتى زادت عن حدها وقلبت غباء
لانى بقول راى بصراحة فاللى قدامى يعنى من غير قلة زوق وبردة من غير نفاق
بيقولولى ان كدة هخسر حاجات كتير ولازم اكون غير كدة لان اللى انا بعتبره صراحة
ممكن ناس تعتبره بجاحة او قلة زوق
بس بعيد عن صراحتى فى راى فى اللى قدامى
انا صريحة اكتر مع و عن نفسى
يعنى احب اقول انا دى
انا بفكر كدة
انا بتصرف كدة
مش ابقى بميت قناع مع الناس
واسيبهم بقى مع الايام يكتشفو اسرار فيا وكانهم بيكتشفو بترول فى الصحرا الغربية
13-اجتماعيه وانطوائية:يعنى احيانا اول ما الاقى حد ممكن ميكونش فى بينا صلة جامدة
اعد اتكلم معاه واتعرف عليه ونحكى بقى ونرغى ولا فارقة معايا وممكن اصاحبه بسرعه
لسة حاصل موقف زى دة امبارح واحدة صاحبة اختى جت تزورها واختى مكانتش لسة
وصلت فاعدت معاها نص ساعه
مقولكوش
عرفت عنها تاريخ عليتها وحكيتلها عن امجادى كلها:)
واحيانا اخرى بلاقينى انطوائية
يعنى لو جيه عندنا ضيوف مخرجش اسلم حتى ولو خرجت ما انطقش بكلمة او ممكن
اسيب البيت واخرج
او لو فى وسط ناس جديدة محبش اتعرف واخد جنب
14-طموحة: بجد بحس انى عندى طموح كتيرة اوى ونفسى اوصل لحاجات كتير بس
المصيبة انى ضعيفة الارادة
بس طموحى مش مجرد احلام انى نفسى ابقى كدة اوكذا او مجرد امانى
لا بفكر بجد وممكن اخطط كمان واظبط كل حاجة على التنفيذ بس مبخدش خطوة بجد
15-عاقلة ومجنونة:دايما صحابى ياخدو راى فى مواضيع تخصهم وتلاقينى بنصحهم
بكل عقل وحكمة وهما بيشوفونى عاقلة وبيثقو فى اراى
لو انا بقى فى موضوع عاوزة افكر فيه او اخد فيه قرار
بحس عاقلى تاه وبعد افكر من غيره مبلاقيش اى معايير فى دماغى للتفكير واعد اطلب من اللى حواليا يساعدونىلانى بفكر لنفسى غلط
16-الصفة الستاشر انا ممكن اسيهالكو انتو لان كلكو عرفتوها من البوست دة _رغم انى اختصرت كتير والله
-الا وهى انى رغاية لدرجة بشيييييييييييعه
والدليل على كدة فاتورة التليفون ساعتين تلاتة كل يوم مع صحابى لغاية ما امى قربت
تعمله استقبال
بس ياريت بيكفينى الموبايل ربنا يخليه هو واللى بيشحنهولى بكمل رغى فيه لما ماما بتزعق على الارضى
ومن غير اى تليفونات انا من النوع اللى يتكلم ميت كلمة فى الثانية ومبهمدش
ربنا يهدينى
هيييييييييييييييييييييه
خلصت الستاشر صفة الحمد لله طلعو ساهلين خالص
ولو عاوزين كمان انا ممكن اكمل
مالكم اتخديتو كدة
هههههههه
خلاص مش هقول حاجة تانى عشان خاطركم
خامسا واخيراااااااا مرر هذا الواجب الى ستة مدونين!
بس كدة
من عونيا
كالعادة
ويسبر
بيرلا
وبعدين
مهيج الجماهير
كيكى
maryoom
seven
.............................
خش ع اللى بعده
تانى تاج من
maryoom
الحمد لله ردتلها الواجب اللى عندى ودبستها
يعنى توجتها انا كمان وبقينا خالصين
بدأت تدون من امتي ؟ و دخلت العالم ده ازاي ؟
بدات تدوين من شهر مايو
وازاى كنت بتابع مدونة كاتروز فكنت ببقى عاوزة اعلق على بوستاتها فعملتلى اكاونت ومدونة وسيبتها فاضية فترة وكنت بستخدم الاكاونت فى التعليق بس
لما جت الاجازة بقى حسيت انى فاضية فقلت اتكلم شوية
ومن ساعه مابدات مقولتش حااجة :)
ايه كان انطباعك في البداية ؟
كنت حاسة باحباط جامد اوى وكنت حاسة انى هبقى غريبة فى العالم دة
بس بجد كل المدونين اللى عرفتهم ناس كويسة جدا حسيت انى اتالفت معاهم بسرعه
مين اكتر واحد بتهتم بتعليقه علي بوستك الجديد ؟
كل اللى بيعلقو عندى طبعا بهتم بتعليقهم ومش بس تعليقهم انا بهتم انى ازور مدوناتهم واقرا فى البروفايل بتاعهم عشان اعرف انا بسمع مين
ايه أهم حاجة اتعلمتها من عالم التدوين ؟
مممممم
هو انا لسة جديدة
بس حاسة ان فيه افادة يعنى لما تقرا فى مدونات كتير بتعرف طريقة تفكير الناس اللى حواليك.. دماغك بتكبر شوية بتشوف الحاجات من منظور الاخرين فبيحصل نضج شوية فى التفكير وانا بعتبر ان عالم التدوين بيدى فرصة كبيرة للاطلاع يعنى بتطلع على اعمال ادبية كتبه المدونين او مشاعر هما عبرو عنها او افكار كتبوها او حياة عايشينها واديما الاطلاع شئ مفيد جدا بيخلى الواحد يعيش دنيته ودنية غيره كمان فببيقى عنده خبرة كويسة فى الحياة وبيقدر يفكر احسن فى المواقف المختلفة
ويوم ورا يوم بكتشف ان عالم التدوين بيفتحلى افق جديدة للمعرفة كل يوم
فى امثلة كتير فى دماغى بس اقربها
قريت فى مدونة قريب بوست عن رحيل شاعر اسمه درويش
من ثقافتى الجامدة جدا افتكرته سيد درويش وقلت فى نفسى ماهو مات من زمان ايه اللى فكرو بيه دلوقت وفى نفس اليوم قريت بوست تانى عن نفس الموضوع
فقلت لا باة انا لازم اسال وفعلاسالت صاحب مدونة ون مان شو وربنا يجازيه خير ادانى لينك عرفت من خلاله من هو محمو درويش وخلانى اطلع على ابداعاته واعرف اصلا ان فى شاعر فلسطينى اسمه كدة
وكمان استفادت اراء الاخرين
يعنى لما بكتب بوست والاقى ناس بتنصحنى او بتقولى رايها فدة اكيد اضافة كبيرة لشخصيتى وطريقة تفكيرى وحكمى على المواقف
ايه أكتر حاجة كرهتها ؟
الحمد لله لسة مشوفتش حاجة تتكره
حاسس ان التدوين له تأثير ؟
تاثير ازاى يعنى
مممممم
هو ممكن يكون زى اى حاجة على النت بتسرق الوقت اوى لانك بتابع مدونات كتير
بس بالنسبالى ممكن يكون ليه تاثير تانى
يعنى ممكن يكون بيريحنى شوية لانى بحس انى بتعامل بطريقتى الحقيقية
بتعامل بصراحة مع نفسى يعنى لو جوايا حاجة ممكن اقولها هنا واشوفها بوضوح اكتر من لو قلتها لحد قدامى
هيعد ينقد او يقول رايه علطول فهحس انى اتلغبطت
ممكن يكون دة التاثير اللى انا حاسة بيه
تهدى التاج لمين ؟
blue-wave
زى الهوا
فزلوكة
spower
nour shahen
emmy baby
بطوط حبوب
rara
بنت الاسلام
zizi
zozo
موناليزا
حسن حنفى
shasha
عايش ولكن
................................
التاج دة صغنون وكميل كدة وسهل خالص من عزيزتى جوجو
انا مشوفتش السؤال بس باين كدة من اجابات جوجو عليه انه كان
اذكر سته صفات من صفاتك؟
طبعا انا معنديش مانع انى اقلكو على ست صفات تانى
يلا عشان خاطركم
1-طيبة:يعنى الحمد لله بحس ان مفيش جواي لئم وخبث والكلام دة وبتعامل بطبيعتى وحقيقتى
ولما بتعامل مع حد بتعامل من قلبى يعنى من غير غباء ولا كدب
2-كريمة:اللى هى عكس البخل يعنى اللى هو اكتر حاجة بكره فى حياتى
3مش فضولية خاااالص :مبحبش اعرف حاجة متخصنيش
4-مش صبورة:يعنى بحس انى معنديش صبر فى مواقف كتير رغم انى عندى قوة احتمال للمواقف بس حاسة انى شخصية مش صبورة
5-خوافة:بس انا مش مقتنعة ان الصفة دى فيا بس ماما شايفة ومتاكدة من كدة
يلا اهى امى بردو ومن حقها تقول فيا مابدالها
6-حونينة
:يعنى مبحبش القساوة فى التعامل واللى قدامى بيصعب عليا جدا وبسرعه اوى
تم بحمد الله
خلصت كل التاجااااااات
بقولكو ايه اللى عنده تاج يلمه
ويخليه فى سره
لحسن اللى هيجيبلى تاج تانى هـ
انا لسه هتعالج من التاجات دى الاول
وهحتاج فقرة نقاهة
.jpg)
16 August 2008 at 12:54
ti scherzi .. vero !!!!
لأ بقى ... انتى بتهرجى ... انا مش هاخد التاج ده ..حرااام عليكى يا شريره :D:D
تانى بقى ... اااااااااه
16 August 2008 at 14:10
انا شايف خير اللهم اجعله خير اسمى؟؟
اكيد دى اشاعه
ال ده تفسير صفخ انك مرحه ونكديه
:D
مرحه فى اجاباتك ونكديه فى اختيار الضحايا
ههههههههههههه
16 August 2008 at 18:17
هههههههههههههههههههههه
لسه هو انتى شوفتى حاجة
دى التاجات بتتباع بالكيلو
ههههههههههههههههه
ربنا معاكى
و الحمد لله انى بعيد عن التدبيسه
بجد ربنا رحمنى
ههههههههههههههههههه
اجاباتك جميلة
و دمك خفيف
تحياتى
اسلام
17 August 2008 at 01:35
السلام عليكم
ميرسى اوى على التزامك وحلك للواجب
اجابات جميلة وصفات اجمل
دومتى بخير
جهااااااااااااااد
17 August 2008 at 01:35
السلام عليكم
ميرسى اوى على التزامك وحلك للواجب
اجابات جميلة وصفات اجمل
دومتى بخير
جهااااااااااااااد
17 August 2008 at 13:32
لا بجد دانتى فيكى كتير اوى منى بجد
اول واحدة احس ان فيها صفات كتير منى للدرجة انك بتقولى كلام انا بردده كتير
بجد انا سعيدة بتدبيسى ليكى لانه عرفنى عليكى اكتر
بس لااااااااااااااااااااا لازم يعنى اللى يدبسك تدبيسه
شوريرة انتى شوريرة نياهاااا
بس احييكى على حلك للواجب
ماشاء الله بتتكلمى باستفاضة
وان شاء الله هبقى احل التدبيسة دى قريب
تحياتى
ايمى
17 August 2008 at 14:13
صفاتك جميلة ورقيقة اوى زيك بالظبط وعلى فكرة انا لسه اصدقائى مدبسينى فى واجب كده وحليته والحمد الله تحياتى ودمتى بالف خير
17 August 2008 at 15:15
ههههههههههههههه
انا شكلى اتدبست يا رجاله
طيب دنا مجاوبتش على اى تاج قبل كده
يادى الليله اللى مش باينلها لون ههههههه
طيب ماشى مقبول منك التاج
بكره يكون محلول ع المدونه ان شاء الله
ونردهالك فى اقرب فرصه ههههه
17 August 2008 at 15:22
اجاباتك عسل يا عسل
بس ينفع يعنى تجاوبى كل التاجات دى كلها مره واحده
ها
بتكركبى الواجبات, وبتؤجلى عمل اليوم الى الغد
هههههههههههههههههه
تحياتى ليكى ياقمر
17 August 2008 at 17:16
ما شاء الله ما شاء الله جميييلة اوي اجابتك تدل على رقتك وصفاء روحك و الاجمل من دة كله على عفويتك و طلاقتك في الكلام ما شاء الله عليكي
انا بجد عاوزة اشكر الي مررولك التاج عشان اتعرفنا عليك اكثر بس انا كنت عارفة انك انسانة جميلة فعلا
بس يعني يعني كان لازم تدبسيني ايه اليوم دة دنا لسة جيلي تاج من شويا
خير اللهم اجعلوا خير طيب يا جميل ححاول اجاوب قبل رمضان باذن الله
دمتي في حفظ الله
18 August 2008 at 01:44
مممممممممممممم
اجابات متميزة
صفات جميلة
ودبستيني في تااج
ده تالت تاج في يومين
:((
بس مش تقلقي هيترد
ان شاءالله قريب جدااااااا
:d
ان شاء الله هحله قريب
18 August 2008 at 02:27
بجد الله يكون فى عونك
16 صفة عن نفسك
بس عارفة أحلى حاجة إيه؟
إن إحنا عرفناكى أكتر
واكتشفنا شخصية جميلة
ودى مهمة التاجات أصلا
وياستى شكرا جزيلا جدا على التاج
ربنا يسهل وأجاوبه قريب
عشان أنا أصلا عليا تاجات متأخرة كتييير
دمتى بخير
18 August 2008 at 04:19
ايووووووووو
كل ده
الأولى ع المدرسة
لالا
ده كده الواحد مش بيتكلم مع أى حد
ربنا يستر
حته على حنب
================
منين كسلانه و منين الأولى ع المدرسة ؟
18 August 2008 at 07:43
perlina
اعيش وادبسك يا حبى :)
جاوبى وبلاش دلع
هاااااا
.......................
بطوط حبوب
لا والله مش اشاعة دة خبر اكييييد
يلا جاوب بقى وورينا المرح انت كمان
:)
18 August 2008 at 07:46
مواطن مصرى نايم
مش مطمنالك على فكرة
اوعى تكون محضرلى تاج فى سرك :((((
اوعىىىى
وبعدين انا عملت فيك جميلة اهو ومش دبستك
عد الجمايل بقى :)
..................
جوجو
انا اقدر مجاوبش على تاجك يا قمر
دانتى باعتالى احلى تاج على الاطلاق :)
18 August 2008 at 07:48
emmy baby
قصدك ايه بجاوبتى باستفاضة دى
قصدك انى رغاية ؟؟؟
ها
ها
انا رغاية
ماااشى :)
دة شرف ليا ان يكون فى بينا صفات مشتركة وبجد الف شكر على التدبيسة اللى زى السكر دى
اللى ادتنى مساحة انى ارغى على كيفى
ههههههه
الناس بتشكرك فى التعليقات اهو بقيتى مشهورة
يلا بقى ورينا شطارتك وحلى الواجب اللى عليكى :)
18 August 2008 at 07:48
shasha
ميرسى ليكى ولذوق
ومدام حليتى التاج قبل كدة يبقى خلاص ولا يهمك
مرة تانية ان شاء الله
18 August 2008 at 07:49
عايش ولكن
مش كان نفسك تدبس بردو
هههههههه
اهو تدبيسة على الماشى كدة
مستنية اجابتك
18 August 2008 at 07:50
حنين
حساكى عاوزة تقولى حاجة
ها
عاوزة تقولى انى رغاية
صح
ها
ماااااشى
منورانى والله :)
18 August 2008 at 07:55
zizi
هههههههههه
هو كل اللى دبستهم طلعو مدبسين ليه
على العموم جاوبى على راحتك واحدة واحدة ومتكركبيش الدنيا زى :)
......
بجد شكرا لكلامك اللى زى الثكر دة
18 August 2008 at 07:56
حسن حنفى
انا مش بنسى الجميل ابدااااا
ههههههههههه
انت مش دبستنى قبل كدة
18 August 2008 at 07:57
فزلوكة
اه شوفتى الظلم ستاااشر صفة
بجد ميرسى ليكى
ومستنين نعرفك احنا كمان :)
18 August 2008 at 08:02
جمعاوى روش طحن
ايووووووووو
دى اسكندرانى
صح ؟
بالنسبة للكسل والنتيجة
فهى دى الخدعه
لما اقعد طول السنة مفتحش كتاب وانام طول النهار واروح الدروس من غير ما احل الواجب فطبيعى ان اهلى يبقو مستعوضين ربنا فيا وفى النتيجة
والمدرسين يبقو باصينلى باستخفاف
بس الكسل مكانش كسل ذهنى
هو كان عضوى بس
انما الحمد لله كان عندى القدرة انى الم المناهج فى اقصر فترة ممكنة وباتقان شديد
والحمد لله عديت :)
18 August 2008 at 15:03
احم احم
الواجب اللى دبستينى فيه
ليه متشفر كدة
للدرجة دى محتاج تشفير
هههههههههههه
لا بجد هى المشكلة دى مكنتش موجودة لما دخلت اول مرة
طب انا هجرب بكرة تانى لو فضلت مشفرة مش هحل الواجب هه بقى
اهى اهى اهى
تحياتى
ايمى
18 August 2008 at 23:06
والرابع اهه اتفضلى استلميه يا قمر ولا يهمك ...
19 August 2008 at 05:58
الله عليكى مدونة تحفة تستهلى مليون تااااااااج
بس مرحة ونكدية
الله علييكى ربنا معاكى
بس بجد اللى بيبقى فية المتناقضات بيبقى طيب جداااااااا
دى حاجة انا واثقى منها ان قلبك قلب خاسيية
سلام واسفة جدا ع التاخييير
19 August 2008 at 09:41
emmy baby
هو اتشفر ليييييه
ماليش دعوة لو فضل متشفر هكتبهولك على الورد وابعتهولك بردو :))))
اشمعنا انا اللى اتدبس علطول :(((
19 August 2008 at 09:43
عايزة اتطلق و
هههههههههههه
هههههههه
هههه
واااااااااااااااااااااااء
حرااااااااااااااااااااااااااام
ليه كدة بس
انا عملتلكو ايه
كل دة عشان فرحت باول تاج جانى
الرحمة يا ناااااس
19 August 2008 at 09:44
نونو
نورتى المدونة
كنتى فييين كل دة
وبعدين هى المدونة الحلوة تستاهل مليون تااااج
لو كدة يبقى قشطة
من بكرة هتلاقو شكل تاااااانى للمدونة هقلبها كابة :)
19 August 2008 at 16:42
السلام عليكم ورحمة الله وبركاته
باقولك ايه ما تيجي نلم حكاية الناج دي
اصل بصراحة ما باحبش اعمل واجبات منزلية
وما تخافيش هادفعلك اللي تقوللي عليه
ههههههههه
علي العموم انا هاحاول اعمله
انا جالي تاج قبل كده قعدت اعمل فيه اسبوعين
يله بقي انت وحظك
19 August 2008 at 17:18
هههههههههههههههههههه هو فضل متشفر مش عارفة ليه والله
بس انا خلاص لاقيت الحل هاخد الاسئلة من مدونة عايش ولكن
شقت انا متسامحة ازاى هههههههههههههههه
مهونتيش عليا تقعدى تكتبى كل ده ورود
تحياتى
ايمى
19 August 2008 at 22:08
لأ حقيقي اتفرمتي يا عيني عليكي يا بنتي :D :D
بس بجد إجاباتك جميلة وعسولة زيك :)
20 August 2008 at 02:10
يا عينى عليكى يا بنتى يالا علقه تفوت ولا حد يموت ههههههههههههه
20 August 2008 at 05:49
حضرتك ليكي تاج عندي
ممكن تستلميه
:d
لسه التاني مش دلوقتي
20 August 2008 at 06:33
بتدبسيني يعني اكمنك عارفه ان الكمبيوتر بايظ
وعند فيكي بقي انا قبلت التاج تاني حاجه سرقت منك البتاعة بتاعة يا ويلكم welcome
وبالمرة قولي الجافا بتاعة الايموشن
عشان نبقي خلصنا ههههههههههههههههههههههه
تحياتي يا جميل
20 August 2008 at 10:58
spower
ياريت تتلم بجد
انا هعيط
انت زعلان عشان دبستك فى تاج واحد
دة انا كل يوم بتدبس فى واحد شكل
الناس مفيش فى قلوبها رحمة
عشان كدة قررت ابقى شريرة وادبس الناس انا كمان
هستنى الاجابات بتاعتك على التاج:)
20 August 2008 at 10:59
emmy
جدعة اتصرفتى
اصل انا مش عارفة اعمل ايه ولا ايه
كل شوية الاقى تاج فوق دماغى لغاية مصدعت
يلا بقى جاوبى خلينى اغير جو
ههههههه
20 August 2008 at 11:00
immigrant
اتفرمت بس
دانا اتعملت عصير
وبعدين حبة التاجات دول ولا حاجة بالنسبة للجاى
نيهااااااا
ان شاء الله المرة اللى جاية هدبسك فى تاجين تلاتة كدة
20 August 2008 at 11:01
appy
نورتى المدونة يا جميل
وياريته علقة وتفوت ولا حد يموت
المدونين ناوين يجيبو اجلى
انا لغاية دلوقتى عندى اربع واجبات مؤجلة
:(
شرفتينى بزيارتك :)
20 August 2008 at 11:02
حسن حنفى
ههههههههههه
هههه
هه
ه
جرااااااااااااااااااااااااااااام
20 August 2008 at 11:03
maryooom
هو لسه الكمبيوتر بعافية ولا ايه
ربنا يشفيهولك يارب
وبعدين انتى تؤمرى
واى حاجة فى المدونة عاجباكى اتفضليها
20 August 2008 at 13:54
حد يجي يوقع سريفر المدونه دي
ارحميييييييييييييييني
مش هوديكي فى حته
انا رايحه الساقيه يوم السبت ومش هاخدك معايا
كوبه عليكي
20 August 2008 at 18:08
اجاباتك جميلة اوي
والبلوج دمه خفيف..
لا بجد الاجابات ظريفة
دمتي بخير
21 August 2008 at 05:12
السلامو عليكم
ازيك أوريجينال
أولا مرسي يا جميل علي تشريفك ليا بعيد ميلادي و يا رب عقبال مأحضر يوم ميلادك و أنت بكل خير و صحة و فرحة
و بعدين هو أنا كل ما أدخل عندك ألاقي تاج دأنت كده مخلتيش تيجان للملوك التانيين
^_^
ربنا يخليكي لينا و تحلي لنا كل الواجبات و التيجان
هههههههههههههه
معلش هما المحبوبين و المشاهير كده إستحملي
وشكرا مرة تانية
21 August 2008 at 15:30
ههههه معرفش ليه أنا أول ما بشوف كلمة واجبات دي بحس أنها سيم للمخدرات :) هههه معرفش بينلي متأثرة أوي بالتلفزيون ...ما علينا إجاباتك جميلة أوي أوي و ربنا يحققلك كل أحلامك و ما تقلقيش حسيبلك فترة نقاهة و بعديها إنشاء الله خديكي تاج :)
السلام عليكي
22 August 2008 at 03:19
بتبسط اوى لما بقرا تاج عن حد..بحس انى كدا ممكن اعرفه من كلامه هو عن نفسه انتى بجد شخصية زى العسل
ربنا يوفقك يا رب
تحياتى
22 August 2008 at 12:53
ماشي يا شريرة هانم
الايام بيننا
اما نشوف الشر ده هينفعك بايه
بس انا هاطلع جدع وهاعمل التاج
23 August 2008 at 04:14
اجاباتك على التاج الاول كلها بتكشف حاجة واحدة بس.. ان ملامحك وشكلك مش بتعكس حقيقتك... يعني شاطرة والناس فاكرة انك بليدة.. حزينة والناس فاكرة انك مرحة..
على فكرة الحزن بقى صفة اصيلة في معظم المصريين والبركة في اللي كان السبب
تقبلي تحياتي
23 August 2008 at 10:07
whisper
ياريت بجد
حد يجى يفدرها
انا تدبسينى يا بنت انتى
حسبى الله ونعم الوكييييييييييييل
ومش عاوزة اروح معاكى الساقية :(
23 August 2008 at 10:08
mero
نورتى البلوج
والحمد لله انه عجبك
وياريت تنورينى دايما :)
23 August 2008 at 10:10
cold aire
الله يسلمك
نورت البلوج
وكل سنة وانت طيب مرة تانية
وبعدين بقى انا مش عاوزة تيجااااان خالص
اتفضلوهم كلهم وارحمونى :(
23 August 2008 at 10:12
Zanooba (Zeinab sab9n)
مخدرات :o
طب وطى صوتك
ههههههههههههههه
شكرا لكلامك الثكر دة
ومن غير ما تبعتيلى تيجان ربنا يخليكى
وخلينا حبايب
عشان هتدبسينى انا عندى وجبات بالكوم وممكن ادبسك انا كمان
هههههههه
منورة :)
23 August 2008 at 10:14
dina
انا اتبسطت اكتر بتشريفك لمدونتى
والحمد لله ان اجاباتى عجبتك
ويارب تنورينى دايما :)
23 August 2008 at 10:16
spower
انا عارفة ان الشر نهايته شر
وكل ما هدبس حد هيدبسنى
بس خليك انت طيب
الشر مش هينفعك
وبلاش تدبسنى ان شالله يخليك :(
23 August 2008 at 10:17
فى حب مصر
طيب دى ظاهرة صحية يعنى ولا لازم اغيرها ؟؟
وربنا يبعد عننا الحزن يارب
23 August 2008 at 22:56
يالهوي
وكمان يالهوي
طب
يالهوي
ايه ده انتي عايشه
لالالا اكيد موش عايشه
ايه كل التيجان دي
الحمد لله انك في نفس
بس سيبك انتي
اجابااااااااااااااااااااات عسسسسسسسل
تحياتي
كيارا
24 August 2008 at 10:20
عووووووووووووووووووووووو انا جيت اتخدتى
..........................
واحشنى موووووووووووووووووووت
بجد
بجد
بجد كل سنة وانتى طيبة يا قمراتى انتى
وعلى فكرة معظم اجابتك تشبهنى كتيررررررررررر
اوووووووووووووووووووووووووى
امواااااااااااااااااااااة
بجد واحشنةى مووووووووووووووت
امواااااااااااااااااااةة كبيرة اووووووى
عووووووووووووووووو
24 August 2008 at 15:13
أنا أنا عصفور
وموطني رمضان
مع الأذكار أطير
وأحمل الأطياب
رمضان كريم
25 August 2008 at 11:49
السلام عليكم
فعلا زى ماقولتى صفاتك فيها تناقض بعض
الشئ بس اغلبها جميل
وربنا يوفقك 3 تيجان مرة واحدة
ههههههههه
تحياتى
26 August 2008 at 05:19
ايه يا بنتى الجمال دا؟
اجابات تحفه والله
وميرسى على تمرير التاج بس الحمد لله انى جاوبته قبل كدا
تقبلى خالص تحياتى
26 August 2008 at 17:01
كل رمضان وانتى طيبه يا جميله يا حبوبه وربنا يتقبل مننا جميعا الصيام والقيام انا حبيت اهنيكى بالشهر الكريم ربنا يعوده علينا بالخير...فى رعاية الله وامنه.
26 August 2008 at 17:45
N.B : أنا ولد
:(
27 August 2008 at 05:35
كيارا
هههههههه
اومال لو عرفتى انى عندى واجبات متاخرة اد دول مرتين
هتقولى ايه
نورتى المدونة :)
27 August 2008 at 05:36
كيكى
وحشااااااااااانى
التعليقات مكانش ليها حس من غيرك يا بنتى :)
نورتى المدونة ويارب
الظروف تكون اتحسنت وكله بقى تمام
اموااااااااااة
:)
27 August 2008 at 05:37
spwer
كل سنة وانت طيب وربنا يعود علينا الايام بخير :)
27 August 2008 at 05:38
tote
شوفتى العذاب اللى بتعذبه على بلوجر
تلت تيجان ولسة نازلين فيا تدبيسات:)
كل سنة وانتى طيبة
27 August 2008 at 05:39
blue-wave
شالله يخليييك
اجابات تحفة اييه بس دة من ذوقك
والحمد لله ربنا رحمك من التاج
بس متقلقش ان شاء الله ليك عنجدى تدبيسة قريب :)
كل سنة وحضرتك طيب
27 August 2008 at 05:41
عايزة اتطلق و
كل سنة وانتى طيبة وعبد الرحمن كمان طيب
وربنا يتقبل منا صالح الاعمال
وربنا يصلح حالك يارب وينصرك
وكل سنة وانتى بالف صحة وسلامة :)
27 August 2008 at 05:42
ميرو
انا اسفة :shy
حصل لبس على تشابه اسمااااء
معلش سماح المرادى :)
المسامح كريم
ورمضان كريم:)