انا عيانة  

45 التعليقات دى بتاعة البوست اللى تحت دة

عندى برد بقالى تلت ايام مبهدلنى
معلش بقى مش عارفة اعد قدام الجهاز خالص واتابع مدونات خالص
بس حبيت اجى اقولكو كلكو كل سنة وانتو طيبين
ورمضان كريم :)
...............................
شفانى الله وعفانى وجعله فى ميزان حسناتى :)

مرة تاج.. اتنين. تلاتة!!  

69 التعليقات دى بتاعة البوست اللى تحت دة






هاهاها هاها هااا
-ضحكة مالية مركزها كدة-
بما انى فاكرة ان التاج دة حاجة كويسة وبتدى برستيج للمدونة والمدون فانا بقى
مالية مركزى اهو
مين قدى عندى تلت تاجات مرة واحدة
وقبلهم علطول كان عندى تاج وكان عندى برد وحالتى حالة
اقول ايييييه
مفيش فى قلوبكم رحمة

اظاهر الناس كان عندها حق لما قالولى بلاش تفرحى اوى بموضوع التيجان دة
ملحقتش اخلص الواجب اللى فات الاقينى فى اول تعليق عليه اتدبست فى واحد جديد وتتوالى التدبيسات
يلا استعنت ع الشقا بالله

......
اول تاج من التلاتة تاج من
emmy baby

ربنا يقدرنى واردلها الجميل

< < < التاج اللى فات حاساه كان سهل شوية دة بقا شكله مصيبة ربنا يستر واعرف اجاوب صح يلا السؤال الاول سين سؤال
............

من الذى دبسك فى هذا الواجب ؟

جيم جواب

العزيزة emmy baby


السؤال التانى
............

اذكر القوانين المتعلقة بالواجب ؟

اكيد انى ادعيلها كل يوم قبل الاكل وبعده
ومرتين بعد النوم


التااالت
..........

اذكر ستة اسرار قد لا يكتشفها من يقابللك للمرة الاولى ؟

ممممممم
كتتير
لان الناس بتقول عليا غامضة
نقول بقا

1-حساسة :مستحيييل اللى يشوفنى لاول مرة يعرف عنى كدة مش عارفة ليه يعنى بس لو بقى فى بينا معرفة جامدة يقولولى مكانش باين عليكى خالص موضوع الحساسة دى
انا بقول يمكن عشان انا فى اول مرة كدة ببقى جد وبتكلم بصرامة شوية
هههههههه -حلوة اوى صرامة دى-



2-ذكية:او بمعنى ادق شاطرة فى الدراسة طول عمرى الناس تحسبنى غبية وبليدة ولما اجيب مجموع حلو يتفاجئو اوى
لما كنت اروح اخد درس فى الثانوية العامة المستر اول ما يشوف وشى يقولى وانتى بقى عاملة ايه ؟؟
شاطرة يعنى ولا هتطلعى عنينا اقولو الحمد لله الاقيه يقولى باين
وبعد كدة ماما تسال عنى يقولها ادعيلها
مالك ياعم انت شايفنى غبيه ليه كدة
كانو بينرفزونى
وصحابى فى سنة تانية قالولى عاوزة تدخلى كلية ايه فقلت يا اعلام او السن منهم اللى
ضحك ومنهم اللى قالى انتىىىىى بسخرية كدة
ولما اتقابلنا فى تالتة بقى وطلعت الاولى على المدرسة احترمونى بقى اخر احترام
وكانو بيقولو عليا سوسة ال يعنى مش مبينة انى شاطرة بس والله مش قصدى حاجة
حتى اهلى والله اتفاجئو لما جبت مجموع حلو فى الثانوية العامة
مش عارفة!! مع انى بمشى طبيعى يعنى ومش بهرش فى راسى كتيير


3-جدعه:والله الموضوع دة بيدايقنى الناس بيقولولى ان فى الاول كدة بيبان عليا انى
ندلة او مش جدعه يعنى
بس بعد كدة بيتفاجئوووووووووووووووووو
اصلى جدعه جدعنه موردتش على حد
ههههههههههههههههههه


4-حزينة:انا عارفة ان الحزن دة حالة بس انا حاسة انه مع مرور الوقت اتحول عندى
لصفة ومش اى حد يكتشفها لانى ببان فى منتهى المرح والزقططة مع الناس ومببينش حزنى لاى حد-


5- فى ناس كتير اول لما تشوفنى تقول عليا دمى تقيل واتمة كدة وماليش فى الهزار
ياعينى ميعرفوش حاجة
بس مش بهزر مع اى حد من اول مرة كدة


6-كتيير بردو بيفتكرونى مغرورة او متكبرة وبيقولو عليا طالعه فيها مع انى والله
اجتماعيه اوى وبكلم كل الناس عادى بس يمكن عشان احيانا كتير بيبقى ليا حدود فى
التعامل مع الناس ومش بكلم اى حد معرفهوش ولو كلمته بيبقى بتحفظ شويتين
يعنى مثلا لو ماشية مع صاحبتى وهى قابلت صحابها واعدو يتكلمو انا ممكن منطقش
خالص واقف اتفرج
بكسف ادخل فى الكلام




الرااااااااااااااااااااااااااابع
....................

اذكر 16 صفة عن نفسك؟

احب اسال سؤال سهل اوى
ميييييييييييييييين اللى حط السؤال دة
نفسى اعرف جيه على نفسه كدة ليه
وبيقول السؤال بكل بساطة وجراءة ووضوح ال يعنى مش همه
طيب ياسيدى هنجاوب
بس
م الاول كدة نتفق على حاجة
اللى هى انى شخصية متناقضة جدا يعنى ممكن تلاقو فيا الصفة وعكسها
محدش يستغرب من حاجة دة الطبيعى بتاعى
ومعنى كدة اننا ممكن نقسم الستاشر صفة على اتنين واقول تمانية وانتو هاتو عكس
التمانية يبقى عندكو ستاشر
شوفتو النصاحة


1- صفة المدونين الاولى: اصلى كل لما اقرا تاج وفيه صفات اول صفة الاقيها مكتوية انا عصبى جداا...
اسم الله عليا بقى عصبية جداااااااااااااااااااا

ماما بتقولى دايما اهو انتى بقى اللى قالو عليه بيتخانق مع دبان وشه
دة مش عشان انا بتخانق مع حد بس لو فى دبانة وقفت على وشى بيبقى يوم اخبر بتعصب جدااااااااا
يعنى من اقل حاجة تلاقينى اتعصبت


2-عنيدة جدا يعنى مش سهل انى اقبل باى حاجة واحييانا تلاقى مخى مخ عيال واعند على حاجات تافهة
وفى نفس الوقت انا مطيعه جدااا
سبحان الله
بس والله فعلا ماما واخواتى بيقولو عليا مطيعة
يعنى لو ماما طلبت حاجة بنفذها او لو حد من اخواتى قالى حاجة مش بعاند يعنى لو
طلبو طلب او لو اتناقشنا فى موضوع تلاقينى مش بشد قصادهم ولو ليهم ملاحيظ -حلوة ملاحيظ- على هدومى او مواضيع تخصنى بردو مش بتخانق ولا بعند ممم وفى حاجات كتير يعنى ببقى مطيعة



3-كسولة:يابنتى اصحى بقالك تلت ايام نايمة
سيبينى ياماما نفسى اناااااام
يابنتى انتى لسة صاحية بقالك نص ساعه لحقتى يكبس عليكى النوم
 يا ماما سيبينى بقى
نامى ان شالله تنامى العمر كله مش هصحيكى تانى تعبتى قلبى

اسطوانة كل يوم
معرفش بنام كل يوم اكتر من 18 ساعه
وال6 الفاضلين مبعملش حاجة تذكر
الكسل مسيطر عليا جدا
هتقولو دة بس عشان الاجازة
لا بردو فى الدراسة بروح الكلية بالعافية وارجع انام واصحى اكل وارجع انام تانى ومش
بذاكر غير اخر شهر والتيرم اللى فات دة ذاكرت فى الساعات الاخيرة قبل كل امتحان
ربنا يلطف بيا بقى فى السنين الجايه



4-كتومة:يعنى سرك فى بيييييير بير غويط يعنى مالهوش قرار مش سهل ان حد يقولى
سر واقوله لحد دة مستحيل اصلا
عشان كدة تلاقى كل الناس عمالة تقولى اسرارها لغاية ما هفرقع من كل الاسرار اللى
بسمعها وكل الناس عاوزة تفضفض مع حد زى بيسمع وميتكلمش بس الصفة دى
مفيهاش تناقض والله دايما ببقى زى مانا مبغيرش النظام ههههههههه
يلا اللى عندو سر يجى يقولوه




5-صاحبة صاحبتى : بصاحب بجد مدام الانسانة اللى قدامى دى قلت عليها صاحبتى خلاص
بقى تطلب عنيا وانا مش هتاخر ممكن اعمل اى حاجة عشان صحابى لانى بحبهم اوى ولو فى ايدى اى حاجة اقدر اقدمها مش بتاخر ولو حد طلب منى حاجة ومقدرتش اعملها
بتدايق جدا وازعل من نفسى وباجى على نفسى كتييير عشان صحابى
بس بدايق اوى لو لاقيت اللى قدامى مش بيتعامل معيا بنفس النظام او على الاقل مش بيقدر



6-مرحة و نكدية:كتير بحب الهزار والضحك او حتى لو مش هيبقى فيه هزار وتهييس
يعنى بحب الاقى الجو اللى حواليا مبهج ومليان فرحة واتصرف من غير ما افكر فى
الكلاكيع اللى جوايا وفى نفس الوقت انا اكتر حد ممكن يتقال عليه كئيب
بجد اتشهرت وسط الناس ان البنت دى كئيبة اوى بتحب النكد بس اللى يعرفنى اوى
بيقول انى مودية يعنى وقت النكد نكديه درجة اولى
و وقت الهزار باش مهيسة كبيرة
والحالة دى بتنعكس على تصرفاتى فى الحياة
يعنى مثلا على سبيل المثال
لو انا فى حالة مرح وبشترى حاجة
يبقى مستحيل اشتريها غير لما افاصل فيها بافترى ولو مخدتهاش بالسعر اللى انا
عاوزاها ممكن نفسويتى تتحطم
ولو كنت منكدة وانا بشترى حاجة
يبقى هيضحك عليا فيها جدا وهبقى عارفة كدة بس هشتريها من غير ما انطق






7-منغلقة:مش عارفة الكلمة صح ولا ايه بس اقولكو معناها وانتو تعرفو
قصدى لما بحس بحاجة بحب اكتمها جوايا اى حاجة
يعنى لو حد ضايقنى مقولش لحد ابدا ان فلان ضايقنى او اشكى ولو حصلى موقف محرج
او حاجة بسكت خالص ومقولش لحد
ولو حد كسفنى مثلا تلاقينى مردش واكتم جوايا
ومن دة كتييير



8-متسرعه: الدنيا عندى بتمشى بسرعه الصاروخ مفيش تفاهم
بزعل من نفسى كتير لما باخد قرارات بسرعه او احكم على اى حد من غير تانى
بتسرع فى حاجات كتير
ممكن فى كلمة اقولها وازعل حد منى
او تصرف اعمله من غير تروى وارجع اندم علي
نفسى ابقى عاقلة كدة وراسيه على راى اماما





9-مبعرفش اخد حقى:يعنى دة الطبيعى بتاعى لو ليا حق عند حد هو ممكن يدهولى او لاء
انا مبعرفش اخده فى كل الحالات يعنى لو فى اشياء مادية بتكسف اطلب حاجتى وممكن
تتنسى وانا منطقش
او لو فى موقف معين تلاقينى معرفش اوصل وجهة نظرى للقدامى او اخد حقى منه
يعنى اتلغبط فى الكلام ومعرفش اتكلم صح فحقى بيضيع برده






10-كتيييير اوى مبعرفش اوصل الافكاار اللى فى دماغى للقدامى
وتلاقينى وانا بتكلم فى موضوع واحد فتحت على عشر مواضيع والدنيا تتلغبط فى دماغى
اقوم اسكت خالص بقىواحاول اظبط الافكار وارتبها تانى فى دماغى




11-خجولة و جريئة:كتييييير اوى بلاقى نفسى بتكسف من حاجات عادية بس بحبنى
وانا كدة اوى بفرح بيا لما الاقينى اتكسفت فى اى موقف كدة بحس انى عندى دم والحمد لله
ذلك رغم ان صحابى دايما كانو يقولو عليا جريئة جدا
ولما يبقو عاوزين يكلمو استاذ فى حاجة معينة او يشتكو للمديرة من حاجة يقولولى يلا انتى جريئة روحى انتى
كلميها
(بيتهيئلى اكتسبت السمعه الجامدة دى بعد موقفى مع المديرة بتاعة المدرسة دة موقف كبير كبير يعنى هبقى احكيه بعدين )




12-صريحة:اللى حواليا بيقولولى انى صراحتى زادت عن حدها وقلبت غباء

لانى بقول راى بصراحة فاللى قدامى يعنى من غير قلة زوق وبردة من غير نفاق
بيقولولى ان كدة هخسر حاجات كتير ولازم اكون غير كدة لان اللى انا بعتبره صراحة
ممكن ناس تعتبره بجاحة او قلة زوق
بس بعيد عن صراحتى فى راى فى اللى قدامى
انا صريحة اكتر مع و عن نفسى
يعنى احب اقول انا دى
انا بفكر كدة
انا بتصرف كدة
مش ابقى بميت قناع مع الناس
واسيبهم بقى مع الايام يكتشفو اسرار فيا وكانهم بيكتشفو بترول فى الصحرا الغربية




13-اجتماعيه وانطوائية:يعنى احيانا اول ما الاقى حد ممكن ميكونش فى بينا صلة جامدة
اعد اتكلم معاه واتعرف عليه ونحكى بقى ونرغى ولا فارقة معايا وممكن اصاحبه بسرعه
لسة حاصل موقف زى دة امبارح واحدة صاحبة اختى جت تزورها واختى مكانتش لسة
وصلت فاعدت معاها نص ساعه
مقولكوش
عرفت عنها تاريخ عليتها وحكيتلها عن امجادى كلها:)
واحيانا اخرى بلاقينى انطوائية
يعنى لو جيه عندنا ضيوف مخرجش اسلم حتى ولو خرجت ما انطقش بكلمة او ممكن
اسيب البيت واخرج
او لو فى وسط ناس جديدة محبش اتعرف واخد جنب







14-طموحة: بجد بحس انى عندى طموح كتيرة اوى ونفسى اوصل لحاجات كتير بس
المصيبة انى ضعيفة الارادة
بس طموحى مش مجرد احلام انى نفسى ابقى كدة اوكذا او مجرد امانى
لا بفكر بجد وممكن اخطط كمان واظبط كل حاجة على التنفيذ بس مبخدش خطوة بجد





15-عاقلة ومجنونة:دايما صحابى ياخدو راى فى مواضيع تخصهم وتلاقينى بنصحهم
بكل عقل وحكمة وهما بيشوفونى عاقلة وبيثقو فى اراى
لو انا بقى فى موضوع عاوزة افكر فيه او اخد فيه قرار
بحس عاقلى تاه وبعد افكر من غيره مبلاقيش اى معايير فى دماغى للتفكير واعد اطلب من اللى حواليا يساعدونىلانى بفكر لنفسى غلط


16-الصفة الستاشر انا ممكن اسيهالكو انتو لان كلكو عرفتوها من البوست دة _رغم انى اختصرت كتير والله -
الا وهى انى رغاية لدرجة بشيييييييييييعه
والدليل على كدة فاتورة التليفون ساعتين تلاتة كل يوم مع صحابى لغاية ما امى قربت
تعمله استقبال
بس ياريت بيكفينى الموبايل ربنا يخليه هو واللى بيشحنهولى بكمل رغى فيه لما ماما بتزعق على الارضى
ومن غير اى تليفونات انا من النوع اللى يتكلم ميت كلمة فى الثانية ومبهمدش
ربنا يهدينى



هيييييييييييييييييييييه
خلصت الستاشر صفة الحمد لله طلعو ساهلين خالص
ولو عاوزين كمان انا ممكن اكمل
مالكم اتخديتو كدة
هههههههه
خلاص مش هقول حاجة تانى عشان خاطركم




خامسا واخيراااااااا مرر هذا الواجب الى ستة مدونين!
بس كدة
من عونيا

كالعادة

ويسبر
بيرلا

وبعدين

مهيج الجماهير
كيكى
maryoom
seven



.............................
خش ع اللى بعده
تانى تاج من
maryoom
الحمد لله ردتلها الواجب اللى عندى ودبستها
يعنى توجتها انا كمان وبقينا خالصين




بدأت تدون من امتي ؟ و دخلت العالم ده ازاي ؟


بدات تدوين من شهر مايو
وازاى كنت بتابع مدونة كاتروز فكنت ببقى عاوزة اعلق على بوستاتها فعملتلى اكاونت ومدونة وسيبتها فاضية فترة وكنت بستخدم الاكاونت فى التعليق بس
لما جت الاجازة بقى حسيت انى فاضية فقلت اتكلم شوية
ومن ساعه مابدات مقولتش حااجة :)



ايه كان انطباعك في البداية ؟


كنت حاسة باحباط جامد اوى وكنت حاسة انى هبقى غريبة فى العالم دة
بس بجد كل المدونين اللى عرفتهم ناس كويسة جدا حسيت انى اتالفت معاهم بسرعه



مين اكتر واحد بتهتم بتعليقه علي بوستك الجديد ؟


كل اللى بيعلقو عندى طبعا بهتم بتعليقهم ومش بس تعليقهم انا بهتم انى ازور مدوناتهم واقرا فى البروفايل بتاعهم عشان اعرف انا بسمع مين


ايه أهم حاجة اتعلمتها من عالم التدوين ؟

مممممم
هو انا لسة جديدة
بس حاسة ان فيه افادة يعنى لما تقرا فى مدونات كتير بتعرف طريقة تفكير الناس اللى حواليك.. دماغك بتكبر شوية بتشوف الحاجات من منظور الاخرين فبيحصل نضج شوية فى التفكير وانا بعتبر ان عالم التدوين بيدى فرصة كبيرة للاطلاع يعنى بتطلع على اعمال ادبية كتبه المدونين او مشاعر هما عبرو عنها او افكار كتبوها او حياة عايشينها واديما الاطلاع شئ مفيد جدا بيخلى الواحد يعيش دنيته ودنية غيره كمان فببيقى عنده خبرة كويسة فى الحياة وبيقدر يفكر احسن فى المواقف المختلفة
ويوم ورا يوم بكتشف ان عالم التدوين بيفتحلى افق جديدة للمعرفة كل يوم
فى امثلة كتير فى دماغى بس اقربها
قريت فى مدونة قريب بوست عن رحيل شاعر اسمه درويش
من ثقافتى الجامدة جدا افتكرته سيد درويش وقلت فى نفسى ماهو مات من زمان ايه اللى فكرو بيه دلوقت وفى نفس اليوم قريت بوست تانى عن نفس الموضوع
فقلت لا باة انا لازم اسال وفعلاسالت صاحب مدونة ون مان شو وربنا يجازيه خير ادانى لينك عرفت من خلاله من هو محمو درويش وخلانى اطلع على ابداعاته واعرف اصلا ان فى شاعر فلسطينى اسمه كدة
وكمان استفادت اراء الاخرين
يعنى لما بكتب بوست والاقى ناس بتنصحنى او بتقولى رايها فدة اكيد اضافة كبيرة لشخصيتى وطريقة تفكيرى وحكمى على المواقف


ايه أكتر حاجة كرهتها ؟


الحمد لله لسة مشوفتش حاجة تتكره


حاسس ان التدوين له تأثير ؟


تاثير ازاى يعنى
مممممم
هو ممكن يكون زى اى حاجة على النت بتسرق الوقت اوى لانك بتابع مدونات كتير
بس بالنسبالى ممكن يكون ليه تاثير تانى
يعنى ممكن يكون بيريحنى شوية لانى بحس انى بتعامل بطريقتى الحقيقية
بتعامل بصراحة مع نفسى يعنى لو جوايا حاجة ممكن اقولها هنا واشوفها بوضوح اكتر من لو قلتها لحد قدامى
هيعد ينقد او يقول رايه علطول فهحس انى اتلغبطت
ممكن يكون دة التاثير اللى انا حاسة بيه




تهدى التاج لمين ؟


blue-wave
زى الهوا
فزلوكة
spower
nour shahen
emmy baby
بطوط حبوب
rara
بنت الاسلام
zizi
zozo
موناليزا
حسن حنفى
shasha
عايش ولكن

................................




التاج دة صغنون وكميل كدة وسهل خالص من عزيزتى جوجو



انا مشوفتش السؤال بس باين كدة من اجابات جوجو عليه انه كان
اذكر سته صفات من صفاتك؟
طبعا انا معنديش مانع انى اقلكو على ست صفات تانى
يلا عشان خاطركم

1-طيبة:يعنى الحمد لله بحس ان مفيش جواي لئم وخبث والكلام دة وبتعامل بطبيعتى وحقيقتى
ولما بتعامل مع حد بتعامل من قلبى يعنى من غير غباء ولا كدب

2-كريمة:اللى هى عكس البخل يعنى اللى هو اكتر حاجة بكره فى حياتى

3مش فضولية خاااالص :مبحبش اعرف حاجة متخصنيش

4-مش صبورة:يعنى بحس انى معنديش صبر فى مواقف كتير رغم انى عندى قوة احتمال للمواقف بس حاسة انى شخصية مش صبورة

5-خوافة:بس انا مش مقتنعة ان الصفة دى فيا بس ماما شايفة ومتاكدة من كدة
يلا اهى امى بردو ومن حقها تقول فيا مابدالها

6-حونينة:يعنى مبحبش القساوة فى التعامل واللى قدامى بيصعب عليا جدا وبسرعه اوى





تم بحمد الله

خلصت كل التاجااااااات

بقولكو ايه اللى عنده تاج يلمه

ويخليه فى سره
لحسن اللى هيجيبلى تاج تانى هـ

انا لسه هتعالج من التاجات دى الاول

وهحتاج فقرة نقاهة























قلب صغير  

66 التعليقات دى بتاعة البوست اللى تحت دة






اكتشفت الايام دى ان القلب الصغير ممكن يحب ويحس اكتر من القلب الكبير..
بيبقى لسة نضيف مشافش اى حاجة تاسيه ولا تخليه جاحد وغبى..
بيبقى لسة مش فاهم ايه فى الدنيا دى..
وبيتعامل بفطرته ويحب كل الناس ومن غير اى غرض..
دلوقتى افتكرت ان قلبى لما كان صغير كان قلب حساس وطيب
اوى مكانش بالقسوة دى..
كنت بحب كل الناس من غير اى سبب كنت بحب صحابى فى الحضانة والمدرسة جدا..
كنت بحب عمو بتاع السوبر ماركت والراجل بتاع العيش..
بجد انا فاكرة انى كنت بحب كل الناس اوى كنت طيبة اوى او كان قلبى طيب اوى
كنت بحب كل اللى حواليا بسهولة وكنت بتعامل بسلاسة وحب معاهم ..
لغاية لما كبرت ودخلت الاعدادى...
جت ماما بقى ومسكت ودنى واديها نصايح..
مش فاكرة ولا نصيحة منها بس انا فاكرة ان المضمون انى المفروض اعمل حدود لنفسى فى التعامل مع الناس
محبش اى حد كدة بسهولة !
الدنيا مفيهاش امان!
مش كل الناس كويسين!
لازم ابعد عن الولاد اللى فى سنى!
والله الست قالت النصايح وسكتت ..
لا قالتلى انتحرى ولا اقتلى قلبك !
هى كان قصدها انى متعاملش بسذاجة بس واتخدع فى اى حد ..
انا بقى اللى متوصيتش..
بعدت نفسى عن كل اللى حواليا وقفلت على قلبى قفلة مهببة..
وقلت خلااااص زمن الطيبة والهبل انتهى
واول حاجة عملتها قبل مادخل باب المدرسة الاعدادية انى
< < <
(شيلته)

وفى فترة اعداى لاقيت بقى البنات عاملة نفسها كبيرة
وكل بنت ليها صاحب بيستناها برة المدرسة
ال يعنى حبيبها بقى وبيجيبو لبعض هدايا فى الفلانتين والحورات دى
انا طبعا ماما موصيانى ان كدة غلط
اذن
كنت اما الاقى اى بنت بتعرف ولد كنت ببعد عنها واقول عليها مش كويسة
حتى لو كانت بتكلم زميلنا فى الدرس و بترد عليه!
... وجينا بقى فى ثانوى
قالولى مرحلة المراهقة والبنت بتحب اى حد وخلاص
وبترجع تندم وتعرف انها كنت بتضيع وقت ومبيبقاش حب حقيقى
اترعبت بقى وحسيت انه مينفعش تهاون
وكمان انا مكنتش عاوزة اتجرح لان قلبى بطبيعته حساس فاى حاجة كانت هتاثر فيه
لو كنت عرفت اى حد كنت هصدق واحب باخلاص
عشان كدة خفت اوى ولو كان فاضل عندى اثار قلب
< < <
(نضفت اى اثار)

يعنى انا كنت اورريدى عاملى على قلبى كنترول فى مرحلة اعدادى
لكن لما لاقيت الموضوع بقى خطير اوى كدة فى ثانوى
عملت عليه اوفر كنترول
خوفا من تسرب المشاعر وانتشار الاحاسيس
وكنت كل لما اشوف بنت بتحب ولد اقول فى نفسى غلطانة وبكرة تندم انها حبت فى السن دة
وقررت انى احافظ على كل المشاعراللى جوايا للانسان اللى هرتبط بيه..
اقدمهاله هدية وتبقى ليه هو بس
لما كنت بفكر بعقلى كنت ببقى مرتاحة اوى انى هدى كل الحب اللى جوايا للانسان اللى هرتبط بيه مش لدة شوية ولغيره شوية واكون غلطانه فى الاخرفقلت استنى
لغاية ما اقابل الانسان اللى هرتبط بيه بيقة عمرى ويبقى هو الحب الاول والاخير فى حياتى
ودة فعلا حصل فضلت محافظة على كل المشاعر اللى جوايا وكاتمة كل احاسيسى حتى عمرى ماحبيت من طرف واحد ولا اى حاجة خالص
قضيتها مذاكرة.. و دح .. وجد.. واجتهاد
وياريته نفع
اخرتها ...!!
فضلت كدة لغاية ما جه الوقت اللى المفروض بقى ادى لمشاعرى افراج..
واخليها تنطلق..
ولكن..
مافيش ..
مافيش مشاعر اصلا عشان تنطلق
اكتشفت انها ماتت من كتر الخنقة بتاعة السنين اللى فاتت دى
بالظبط زى لو عندك عصفور وحبسته ولا بتاكله ولا بتشربه ولا حتى بتسال فيه
وجيت بعد وقت طووووويل عوزه يطير!
ابقى قابلنى ..
هتلاقيه ميت اصلا!!
المهم بقالى فترة بحاول معاها ونفسى اصلح غلطتى بس مافيش فايدة خالص
كل لما افتكر طفولتى وافتكر اد ايه كان قلبى رقيق وحساس ببقى عاوزة اعيط
دلوقتى مافيش نبض خالص مش عارفة اتقبل اى حد فى حياتى

حبيت اضحك على نفسى مرة واقنعت نفسى انى بحب
وخلاص بقى الدنيا اتصلحت
بس ملاقيتش جوايا اى حاجة من اللى بسمعها عن الحب
او اللى حسيت بيها قبل كدة
مانا زى ما قلت حبيت كتيير وانا صغيرة
يعنى عارفة من معنى الحب
بس من بعيد لبعيد
يعنى افتكر كدة انه حاجة كويسة ..
بيخلى الانسان فرحان بالدنيا والدنيا بتبقى حلوة ادامه
انا فاكرانى مرة وانا صغيرة
حبيت !!
حبيت ولد يعنى
كان عندى فى عين العدو خمس سنين

ههههههه

والله كان اجمل حب
مكنتش بحبه لهدف معين او لاى حاجة او اننا هنخطب بقى والكلام دة
لا
كنا عياااااال
بس حبيته اوى لانه عمل معايا موقف جدع اوى...
المهم
فاكرة بقة لما كنت بحبه كنت نشيطة اوى وكنت بتنطط طول اليوم وكنت فرحانة اوى
وكنت قبل كدة بكسل انزل اجيب حاجة لماما
لكن لما حبيته كنت بتلكك وانزل اجيبلها اى حاجة
كنت حابة الدنيا وكنت طايرة كدة
اييييييييييييه
الله يرحم ايام زماااان
دلوقتى بقى بتحايل على نفسى احب
بس بحس انى برد على نفسى واقولها ابقى قابلينى
مش هتحبى حتى لو عملتى ايه
وفنفس الوقت انا مش عاوزة ارتبط وخلاص
مش عاوزة اعيش حياة مجردة من الاحاسيس نهائى كدة..
نفسى ارجع مشاعرى بس خايفة افضل مش لاقياها ولا الاقيلها اثر جوايا..

كتير بقول لنفسى لو رجعت صغيرة عمرى ما هعمل اللى انا عملته دة.. اكيد هسيب قلبى على راحته اوى واسيبه يتنفس ويحس بكل اللى هو عاوزه ويكفينى انى احكم عقلى واكيد عقلى كان هيحافظ على قلبى ومكانش هيخلنى اعمل حاجة واندم عليها.. احساس صعب انك تعيش وانت من غير مشاعر
حتى لو مشاعرك اتجرحت مرة من حب او فراق فده ارحم من انك تكون من غير احساس خالص

.....

ملحوظة
انا مش بقول كدة عشان انا مش لاقية حد احبه
بالعكس انا عمرى ماكنت هفكر فى الموضوع غير لما لاقيت نفسى فعلا قدام موقف بجد ومش قادرة ابقى قده
مقدرتش احس باى حاجة معرفتش غير انى اهرب
والموقف اتكرر تانى ودورت جوا نفسى على اى حاجة بردو معرفتش
خايفة افضل كدة وخايفة ..افقد الامل
ومش عاوزة ارتبط بحد واظلمه معايا وانا مش لاقيه جوايا حاجة اديهاله

تاج الملوك  

69 التعليقات دى بتاعة البوست اللى تحت دة


هييييييييييه هيييييييييييه
جالى تاج يا ولااااد.. 
- بزغرت وفرحانة تقولش جالى عريس!!-
هههههههههه


من ساعه ماعملت مدونة وانا عمالة اسمع كلمة تاج!!
كان نفسى اعرف ايه النظام بس كنت مكسوفة اسال
بس الحمد لله فهمت بقى اخيرا من كتر المتابعة
و اول ما فهمت ..لاقيت حســـــن حنفى باعتلى تااااج 

يعنى توجونى وانا لسة نونو فى عالم التدوين


نجرب عملى بقى اللى فهمته
>
>
>


بسم الله الرحمن الرحيم
أعطيتك ثلاث وردات .. من هم الثلاث أشخاص اللى هتهديهم الورد اللى معاك ؟؟

اكيد اول وردة لماما ربنا يخليهالى ...الوردة التانية لصحابى اللى بحبهم كلهم..

.الوردة التالتة هديها لابن الحلال.. !



لو أعطيتك ورقة بيها 3 سطور فقط و قلت لك أكتب فيهم اللى أنت عايزه هتكتب إيه ؟؟


اول سطر هكتب: اللهم يا مقلب القلوب والابصار ثبت قلبى على دينك
تانى سطر هكتب: يامصر هتفوقى امتى من اللى انتى فيه
تالت سطر هكتب:رب لذة اوجبت حسرة وزلة اعقبت ذلة ومعصية سلبت نعمة وضحكة جرت بكاء




ما هو هدفك فى الحياة ؟

مممممممممم
صعب اوى انى اقول هدفى فى الحياة لانى عندى اهداف كتيييييييير بس مبحققش اى حاجة
فى من اهدافى وقتها راح.. وفى لسة مجاش وقته
بس حاسة ان النتيجة واحدة مبحققش حاجة فى الاخر
دة بالنسبة للدنيا.. لكن بحاول على قد ما اقدر انى احقق هدف اى انسان مسلم وهو رضى ربنا عنه
اللهم ارضى عنى



إن شاء الله بكرة هيكون أحسن من النهاردة "هل تصدق هذه المقولة ولماذا؟؟

ممممم
ممكن!!
  ان شاء الله لكن مش متاكدة



أجمل مقولة سمعتها فى حياتك ؟؟


مافيش اجمل من كلمة لا اله الا الله
وفى مقولات كتير بتعجبنى زى: استمتع بالنظر الى الصباح عند طلوعه فان له جمالا وجلالا واشراقا يفتح لك الامل والتفاؤل
ودة حقيقى فعلا انا لما ببص للسما والنهار بيطلع واشوف الشروق بحس براحة غريبة وببقى متفاءلة جدا



من المغنى اللى بتحبه أوى ؟؟
مش بحب حد معين


و إيه أحلى أغنية بتحبها ؟؟
فى اغانى كتير بحب اسمعها.. اكتر اغنية بحب اسمعها اغنية عصفور لعايدة الايوبى


غزة " تمثل لك إيه فى حياتك ؟؟

انا حاسة ان غزة.. جرح جوايا ة وبيألمنى بشدة و مش قادرة اداويه ولا اعمله اى حاجة


أعطى لإنتمائك لوطنك درجة من مائة ؟؟

انتماء.. يعنى ايه انتماء لو يعنى حب البلد دى فاناهدى لنفسى درجة 100% بس بيتهيئلى ان الانتماء مش ان كل واحد يقول انا بحب البلد دىوبعشق ترابها طب ياللى بتحب البلد اوى كدة ودايب فى هواها عملتلها ايه مانت زيك زى غيرك بدل متقول كفاية بقى وتبدا تصلح بترمى الزبالة فى الشارع وتقول هى جت عليا وبتدفع رشوة لو عاوز تمشى مصلحة وتقول مش هتفرق و..و.. الخ عشان كدة انا ممكن ادى لنفسى درجة بالسالب


لو تزوجت و أنجبت بنتين و ولدين أى الأسماء تختار لهم
ولدين : فارس و حمزة
 بنتين: بنتين بس يعنى؟؟ انا بحب اسم مريم واريج وايثار وصفية



عمرك غشيت في امتحان وانت صغير؟؟
وانا صغيرة لااااااا عمرى ماغشيت بس لما كبرت اتعلمت الفساد
فى الثانوية العامة بعيد عن السامعين كنت بغش قوانين الرياضة من البنت اللى قدامى وكانت بتقلهالى غلط بس انا كنت بفتكرها واصححها
هههههههههه



لو أتعرض عليك رشوة كبيرة و انت فى زنقة مالية هتعمل إيه؟؟
ممممممم
هعرض غلى ضميرى النص عشان يرضى 
ههههههههههه
اكيد طبعا هرفهضها :)




قول 3 صفات ب 3 كلمات بس توصف بيهم شخصيتك؟

عصبية
متناقضة
 جدعة


صفة عايزها في شريك حياتك؟
صفة واحدة بسسسسسسس طيب قول مية ولا الف
  
ممممممم 
يكون ملتزم بجد مش اى كلام يعنى ومفيش مانع يكون حنين ورومانسى وذكى وحازم ووسيم ووووو بس كدة 



ايه المجال اللى غير دراستك وشايف نفسك فيه قوي؟؟
كنت احب اكون صحفية بس بحب مجال دراستى اكتر





بتحب السفر ؟؟

اة طبعا بحب السفر.. لغاية اخر الشارع كدة
اصل انا تحركاتى فظيعة!! لو رحت لغاية التليفون عشان ارد عليه تبقى رحلة فلو وصلت لاخر شارعنا ابقى سافرت واتغربت هههههههه بس عامتن بحب اسافر اسكندرية اصيف هناك بس ياريت طايلين

طب دلوقتى حالا ايه المكان اللى نفسك تكون فيه ؟
حالا؟؟حالا حالا يعنى نفسى اكون فى السرير والله بقالى يومين منمتش ومش شايفة ادامى!


تمرر التاج ده لمين ؟؟


Egyptian Perle

قطع السكر احيانا لا تحلى

طرطشة افكار

I'm your mind




يلا حاجة ســــاقعة بيبـــــــــس  

27 التعليقات دى بتاعة البوست اللى تحت دة

يلا كل اللى ليه عندنا حاجة ساقعة يجى يبارك ويا خدها
مع انى مكنتش متفاءلة خالص بموضوع الحاجة الساقعة دة ..
قولتولى ليه؟؟!
اقولكو ليه بقى..
اصل انا واخويا الاكبر منى علطول طول عمرنا بننجح
ونطلع من الاوائل ومفيش اى مشاكل
لا بنجيب حاجة ساقعة ولا اى حاجة من الكلام دة..
حتى فى الثانوية العمة جبنا مجاميع جامدة
ومحدش جاب سيرة البيبسى دة خااالص
جت ماما كدة ومن غير اى مناسبة التيرم اللى فات
كنا فاعدين فى امان الله راحت قالت لاخويا ايه
لما تنجح هجيبلك بيبسى وافرقه
اخويا دة كل تيرم ليه فى الكلية بيجيب جيد جدا..وتقديرات كويسة يعنى
التيرم بتاع البيبسى بقى..
شال اربع مواد وجاب فى الباقى مقبول :S
دة عشان مكتوب اننا منفرقش بيبسى !
هههههههه
المهم
الحمد لله انا نــــــجـــــــــحــــــــــــتــــــ
ومشيلتش ولا مادة..
ومجبناش بيبسى :)
بس سبحان الله النتيجة جت ملغبطة جدااا :S
ومفيش اى حاجة من المتوقعة حصلت
يعنى الماداة اللى كنت قلقانة انى اشيلها
اللى اعدت ارن وابعت رسايل لصحابى جبت فيها جيد جدا
وفى مادة كان طالع عينى فيها ..حضور ومذاكرة وجبت فيها مقبول :(
الظاهر ان الحضور والمذاكرة من اول السنة مش مفيد خالص
لان دة حصل معايا التيرم الاول وبردة
كان فى مادة طالع عينى فيها وفى الاخر جبت فيها مقبول
ولما شوفت المقبول التيرم الاول اعدت اعيط وحلفت
انى مش هذاكر المادة تانى ولا هحضرها
وفعلا لا ذكرتها ولا حضرتلها محاضرة
مفيش غير اخر محاضرة حضرتها ومفهمتش اى حاجة
وكمان مكانش معايا المنهج بتاعها
وذاكرتها ليلة الامتحان بالعافية
وكانت النتيجة ايه!!!!!!!!!
جبت فيها التيرم دة امتياااااااااااااااااااااااز
هههههههههه
عادى انا كنت بقول لو كل الكليات فيها كوسة
الا كليتى مستحيييييييييييييل يكون فى كليتى كوسة
وفعلا هى مفيهاش كوسة دى فيها كفتة وهمبرجر كمان
المهم انى نجحت الحمد لله وارتاحت من القلق اللى كنت عايشة فيه..
واتعلمت حاجة بجد ان ربنا بيدى كل واحد حقه
ودة بان فى التقدير العام بتاعى
اللى هو جيد
ودى اول مرة اجيب التقدير دة فى الكلية بعد ماكنت بجيب جيد جدا وامتياز
وصلت للجيد
وسبحان الله الجيد جدا عندنا من 85% وانا جبت 84.5%
يعنى جيد مرتفع بس ارتفاع شاهق اوى :)..
عشان فى الاخر متساواش مع الناس اللى اجتهدت اكتر منى
الحمد لله
اتفضـــــــــــــلو

قلقــــــــــــــــــــــــــــــــــانة..  

43 التعليقات دى بتاعة البوست اللى تحت دة



ادعولى بجد من قلوبكم انى انجح
بقالى شهر ونص مخلصة الامتحانات ولسة النتيجة مطلعتش
اخويا خلص بعديا بيوم ونتيجته طلعت بقالها شهر ..
وانا اعدة مستانياها وحاطة ايدى على خدي:(
اول مرة اعمل كدة ...
دة حتى الثانوية العامة مكانتش فارقة معايا كدة..
بجد قلقانة اوى يمكن عشان النتيجة اتاخرت اوى
مممم
ولا عشان دة اول تيرم اعك فيه بالطريقة دى ..خايفة اتفاجئ انى اشيل ماادة :(
اصل كان فى مادة انا استهبلت فيها اوى اعدت ساعة ونص ابص للورقة من غير ما اكتب حرف
والله مش عارفة ايه اللى جرالى ساعتها ..نسيت انى فى امتحان خالص وطلعت الموبايل واعدت ابعت لصحابى رسايل !!!
والساعة ونص الفاضلين على ما افتكرت انى بمتحن اخر السنه بقى مكفوش كمية الاسئلة اللى كانت موجودة
يااااااااااارب مشيلش المادة دى لو شيلتها هتبقى اول سابقة ليا :[
 ومش عارفة ساعتها هعمل ايه؟! هقول لماما ولا هخبى عليها ..
 ولو طلعو مادتين :(..
يارب النتيجة تطلع عشان اخلص من القلق دة واعرف وخلااص بس خايفة اخلص من قلق الانتظار اتصدم بالنتيجة المرة وخصوصا انى عارفة انى فى مواد _كتيير _ فتحتها ليلة الامتحان كل تيرم كنت بقول يارب اجيب تقدير عالى امتياز جيد جدا.. المردى بقول يارب انجح
يارب انجح...

حملة تجديد  

11 التعليقات دى بتاعة البوست اللى تحت دة


من ساعه ما اخدت الاجازة وانا حاسة بملل فظيع.. مش بعمل اعمل اى حاجة مفيدة او بمعنى اصح مش راضية...
اعدة وحاطة ايدى على خدى لغاية مالاجازة قربت تخلص
وانا زى مانا ..صحيت امبارح اعدت افكر و قلت انا هفضل كدة علطول ولا ايه ؟؟؟
قلت لاءا كفاااااااايية ملل واحباط...وعملت انقلاب على نفسى
وعملت بنصيحة باباى واكلت السبانخ>>>>>>>>وانطلقت

غيرت شكل اوضتى خالص.. طبعا بهدلتها بس غيرت النظام
قلت يمكن التجديد يغير من الازمة شوية
ومن كتر النشاط اللى حل عليا بقيت اى حاجة تقابلنى اعد اغير فيها

وادى النتيجة>>>
غيرت شكل المدونة قلت يمكن نفسى تتفتح بقى بدل ماانا ماليش نفسى اكتب اى حاااجة خالص
يلا قولولى رايكو ايه فى شكلها دة انا حاسة انه هادى اكتر ومرتب على عكس اللى حصل لاوضتى :((



النهاردة :امبارح بكرة  

14 التعليقات دى بتاعة البوست اللى تحت دة



"النهاردة زى امبارح وهو بكرة..مفيش فرق" ..كتير اوى بسمعهم بيقولو كدة..بس انا مش شايفة كدة خالص..انا

دايما حاسة انى امبارح افضل ميت مرة من النهاردة.. واحسن مليون مرة من بكرة ..

طب ماهو امبارح الحلو دة هو النهاردة لما يجى بكرة .. يعنى النهاردة هيبقى امبارح بكرة ..

طب ليه مش شايفة ان النهاردة احسن من بكرة..ليه مش قادرة استغل النهاردة واعيشه..واعيش الحلو اللى فيه.. دايما

ببص على الفات..واندم على اللى ضاع منى امبارح..واحس ان الايام الجميلة هى اللى فاتت بس ..ومش هترجع تانى

..انا عارفة انى بضيع النهاردة فى التفكير فى امبارح..بس خلاص حاسة انى تايهة لدرجة مش هقدر اوصفها..تايهة

مع الايام اللى بتمر ..وانا واقفة مش بتحرك ..سايباها تمر من غير مادخل جواها واحس باللى بيحصل..بس زى ما

بندم انى ضيعت امبارح.. هندم بكرة انى ضيعت النهاردة..نفسى افوق من الاحساس دة..واخلى النهاردة حتى لو هو

اسوا يوم فى حياتى اخليه اجمل يوم ..اغير نظرتى شوية للحياة..

بس عقبال لما افوق هكون هندم على حاجات كتير ضاعت

هندم على النهاردة اللى ضاع فى الملل والاحباط ..

هندم على ميت امبارح مش واحد بس..((

المشكلة انى عارفة انى غلط

بس مش عارفة افوق بقى

حلم رومانسى  

12 التعليقات دى بتاعة البوست اللى تحت دة



عادى يعنى ..زى اى بنت بتحلم حلم رومانسى انا كمان بحلم حلم رومانسى جميييل...
بس مش عارفة ليه حاسة ان فى اختلاف بين حلمى الرومانسى وبين احلام كل البنات ..
كل لما اسال بنت تقولى انها بتحلم...
انها تتمشى مع حبيبها على البحر قبل الشروق..
او تقف معاه عند النيل وقت الغروب ..
يتمشو تحت المطر فى وسط الشارع وايديهم فى ايد بعض..
او يقولها كلمه رقيقة على ضوء الشموع..
بتحلم بحبيب رومانسى يحبها ويحس بيها من غير كلام ..
اكتشفت بقى مؤخرا ان انا كمان عندى احلام رومانسية !!!
بس مش عارفة ليه مافيهاش ضوء شموع ولا بحر ولا نيل والكلام دة كله ..
انا بقى بحلم بايه خير اللهم اجعله خير ..
بحلم كدة لما حبيبى يجى من الشغل يدخل ويخبط الباب وراه اقوم انا اصحى على صوت الباب وهو بيتقفل (قصدى وهو بيترزع) مممم
هفتح بقى باب اوضتى هلاقيه واقف فى الصاله ..-جاى متبهدل من الشغل وهيموت من الجوع-.. واقله وانا شكلى نعسااااان انت جيت يا حبيبى؟؟! ..
يرد وهو على اخر نفس :حضرى الغدا يا حبيبتى عقبال ما اغير هدومى..ابصله كدة بعين واحد -والتانية مقفولة من النوم - وارد اقله غدااا!!!
انا لسة مطبخطش ياحبيبى ...
يروح هو يشخط فيا ويقولى انتى بتستهبلى !!!!
انا بقى هتنرفز واقله :متشخطش من فضلك !يعنى اعمل ايه مانا لسة صاحية
يقوم الراجل يفيض بيه ويكون واقف جنب السفرة يروح ماسك الفازا ويخبطنى بيها .
-اىىىىىى-
وطبعا هقع من شدة الخبطة...
فهو يتخض عليا ويجى يشوف ايه اللى جرالى ويقولى :مالك يا حبيبتى جرالك حاجة ؟؟
فارد عبيه بمنتهى الرومانسية واقله ولا يهمك يا حبيبى !!!!
مش دة بردو حلم رومانسى؟؟

مش عارفة افكر  

4 التعليقات دى بتاعة البوست اللى تحت دة


بقالى فترة حاسة ان الدنيا ملغبطة اوى فى دماغى.. كل لما افكر فى حاجة الغبط حاجة تانية ..

مش عارفة افكر صح فى اى حاجة .. مفيش موضوع واحد فى حياتى كبير او تافهة قادرة افكر فيه وفى الاخر اوصل لقرار طبيعى

والله انا خايفة على نفسى لو فضلت كدة انى بقى مختلة عقليا ... طب وبعدين!!!
ممممممم
دانا حتى مش عارفة السبب... فجأة كدة لاقيتنى مش عارفة افكر..ولا عارفة حتى اعبر عن الافكار اللى هرت دماغى .. مصيبة ليكون دة الزهايمر!! ربنا يستر

حاسة انه مفيش امل ارجع زى الاول.. ابقى عادى يعنى و افكر طبيعى..

وبعدين انا بدات افقد الثقة فى كل افكارى.. وطريقة حكمى على الحاجات
..وحتى الكلام اللى بتكلمه
:((

انا عملت مدونة ليه!!  

2 التعليقات دى بتاعة البوست اللى تحت دة





مش عارفة انا ليه عملت المدونة بجد..انا من فترة عاوزة اعمل واحدة بس مش عارفة ليه
هل ياترى هكتب ايه!!.. هفضفض شوية..
ولا هكتب كلام جوايا وخلاص ..
مش عارفة انا رايحة فين .. ولا هعمل ايه..
مش عارفة..
بس انا من فترة بتابع مدونات صحيح مش كتير
بس الفكرة عجبتنى
وعجبنى اكتر افكار اصحاب المدونات اللى قريتها
يوم الاربع قريت بوست (حاجة مالاهاش لازمة من غيره)فى مدونة روز i'm your mind
البوست دة حسيت انى انا اللى كاتباه.. كل حاجة فيه حسيتها اوى
وبعدها علطول فكرت اقوله انا باحساسى.. ولاقيتنى بعمل المودنة دى
ولما جيت اسميها..
لاقيتنى بسميها من غير ما فكر كان يا ماكان
بس حسيت انى عاوزة اتكلم فى مدونتى عن اللى كان
وافتكر تانى احلى ما كان فى عمرى
عندى كلام كتير اوى ..مش عارفة اقوله لحد ..نفسى اقوله هنا..يمكن احس براحة
يارب الموضوع ينجح وارتاح مع مدونتى..D:


Newer Posts
Subscribe to: Posts (Atom)